नयाँदिल्ली । भारतको मध्य प्रदेशको ग्वालियरमा अनौठो तरिकाले ९ वर्षीया बालिकाको शल्यक्रिया गरिएको छ । ब्रेन ट्युमरको बिरामी सौम्या नामकी बालिकाले आफ्नो शल्यक्रिया भइरहँदा सुरुवातदेखि अन्त्यसम्मै पियानो बजाइरहिन् ।
उनले शल्यक्रियाका दौरान पियानो मात्रै बजाइनन् अझ गीत पनि गाइरहेकी थिइन् । यो शल्यक्रिया (अप्रेसन) शुक्रबार ग्वालियरस्थित बिरला अस्पतालमा डा. अभिषेक चौहानको नेतृत्वमा भएको थियो । करिब ६ घण्टा लामो शल्यक्रियामा बिरामीको टाउकोको हड्डीबाट ट्युमर सफलतापूर्वक निकालिएको थियो ।
मुरैना जिल्लाको बानमोरकी सौम्यालाई मिर्गी रोग लागेको थियो । उनी पछिल्लो २ वर्षदेखि मिर्गीको चारवटा औषधि खाँदै थिइन् । तर यसबाट उनलाई केही फाइदा भएको थिएन । डा. चौहान भन्छन्, “बच्चलाई मिर्गी थियो र यसका लागि उसलाई चारवटा औषधि खुवाइरहँदा पनि निको भएको थिएन । एक वर्ष अघि गरिएको सिटी स्क्यान र अहिलेको हेर्दा उसमा ट्युमर पनि चार गुणा बढिसकेको थियो ।”
त्यसपछि जाँचका लागि करिब एक वर्षअघि लैजाँदा उनलाई ब्रेन ट्युमर भएको पत्ता लागेको थियो । उनका परिवार यसको शल्यक्रिया गर्न तयार थिएनन् । किनभने यसको शल्यक्रिया कठिन मात्र थिएन जोखिमपूर्ण पनि थियो । बिरामी बालिका जीवनभर विकलांग हुने डर पनि थियो । तर बिरलाका डाक्टरहरुले सफलतापूर्वक गरेको शल्यक्रियापछि अहिले सौम्या स्वास्थ छिन् ।
