काठमाडौं । चितवनमा जारी गौतमबुद्ध कप क्रिकेटमा टिम राप्तीले रोमाञ्चक जित निकालेको छ । सोमबार भएको खेलमा राप्तीले टिम नारायणीलाई एक विकेटले हराएको हो ।
चितवनस्थित गौतमबुद्ध अन्तराष्ट्रिय क्रिकेट मैदानको हाता भित्र रहेको नमुना मैदानमा नारायणीले दिएको १३९ रनको लक्ष्य पछएको राप्तीले निर्धारित २० ओभरमा ९ विकेट गुमाउँदै १३९ रन पूरा गरेको हो । राप्तीका लागि कुशल भुर्तेलले अर्धशतकीय पारी खेले ४१ बल खेलेका उनले ४ चौका र ६ छक्काको सहयोगमा ६५ रन बनाउँन सफल भएका थिए ।
त्यस्तै कमल सिंहले २३ रन बनाउँदा आरिफ शेख १४ तथा सुमित महर्जनले १२ रनको योगदान गरे । बलिङतर्फ नारायणीका लागि करण केसीले सर्वाधिक तीन विकेट लिए । त्यस्तै किसोर महत्व र सुसन भारीले समान दुई–दुई विकेट लिन सफल भए । त्यस्तै दिपेश श्रेष्ठ र साहव आलमले समान एक–एक विकेट लिए ।
यसअघि टस जितेर पहिले व्याटिङ गरेको नारायणीले निर्धारित २० ओभरमा ८ विकेट गुमाउँदै १३८ रन बनाएको थियो ।
नारायणीका लागि किशोर महत्वले सर्वाधिक ३६ रनको योगदान गरे । त्यस्तै करण केसीले ३२ रन बनाउँदा सुसन भारीले १८ रन तथा रित गौतमले १३ रन बनाए । बलिङतर्फ राप्तीका लागि अविनास बोहोराले सर्वाधिक तीन विकेट लिए । त्यस्तै सुर्य तामाङले दुई विकेट लिए । राप्तीका लागि जितेन्द्र मुखिया, भुवन कार्की र कमल सिंहले समान एक–एक विकेट लिए ।
अब दुई टोलीबीचको फाइनल खेल भोलि (मंगलबार) हुनेछ ।