काठमाडौं । चितवनमा जारी गौतमबुद्ध कप क्रिकेट प्रतियोगिताको फाइनलमा टिम राप्ती र नारायणीले खेल्ने भएका छन् । आइतबार भएको खेलमा राप्तीले वागमतीलाई पराजित गर्दै फाइनलमा स्थान बनाएको हो । चितवनस्थित निर्माणाधीन गौतमबुद्ध अन्तर्राष्ट्रिय क्रिकेट रंगशालाको नमुना मैदानमा वागमतीलाई ११ रनले पराजित गर्दै राप्ती फाइनल प्रवेश गरेको हो ।
यता वागमती लगातार दोस्रो खेलमा पराजित हुँदा प्रतियोगिताबाट बाहिरिएको हो । राप्तीले दिएको १३० रनको मध्यम लक्ष्य पछ्याएको वागमती १९ ओभर ४ बलमा २ अल आउट भएको थियो । वागमतीका लागि सोमपाल कामीले सर्वाधिक ३५ रनको योगदान गरे । यस्तै अनिल शाहले २२ रन जोड्दा रोहित पौडेल र ज्ञानेन्द्र मल्लले समान १३–१३ रन बनाउन सफल भए ।
बलिङतर्फ राप्तीका लागि कमल सिंह ऐरी, अविनास बोहरा र बसन्त कार्कीले समान २–२ विकेट हात पारे । यसअघि पहिले ब्याटिङ गरेको राप्तीले निर्धारित २० ओभरमा ९ विकेट गुमाएर १२९ रन बनाएको थियो । राप्तीको लागि अमित श्रेष्ठले सर्वाधिक २६ रन बनाए । शरद भेषावकर र कप्तान बिनोद भण्डारीले समान २१–२१ रन बनाउन सफल भए । बलिङतर्फ वागमतीका लागि सोमपाल कामी, सगर ढकाल र रशिद खानले समान २–२ विकेट लिए ।
अब फाइनलमा राप्ती र नारायणी भिड्ने छन् ।