काठमाडौं । जर्मम बुन्डेस लिग फुटबलमा साविकको विजेता टोली वायर्न म्युनिखले बराबरी खेलेको छ । शनिबार राति भएको खेलमा वायर्नले युनियोन ब्रेलिनसँग १–१ गोलको बराबरी खेलेको हो ।
युनियोनको घरेलु मैदानमा भएको खेलमा उपाधि दावेदार मानिएको वायर्नसँग बराबरी खेल्दै एक–एक अंक बाडेको हो ।
खेलको चौथो मिनेटमा ग्रिसा प्रोमेलले गोल गर्र्दै टिमलाई अग्रता दिलाए । पहिलो हाफमा १–० गोलको अग्रता बनाएको घरेलु टोलीले आफ्नो अग्रतालाई अन्तिमसम्म कायम राख्न भने सकेन ।
६७ औं मिनेटमा वायर्नका लागि रोवेर्टाे लेवान्डोस्कीले गोल गर्दै टिमलाई हारबाट जोगाए । वायर्नले पछिल्ला दुई खेलमा बराबरी खेलेको छ ।
बराबरीसँगै लिगमा ११ खेल खेलेको वायर्नले २४ अंक जोडेको छ । वायर्न अंक तालिकाको शीर्ष स्थानमा छ । यता युनियोन १७ अंकसहित तालिकाको छैटौं स्थानमा छ ।
शनिबार नै भएको अर्काे खेलमा आरबी लाइपजिगले वर्डेरविरुद्ध २–० गोलको जित निकाल्न सफल भएको थियो ।