विदेश
काठमाडौं । रुसका राष्ट्रपति भ्ल्यादिमिर पुटिनले पहिले युक्रेनमाथि आतंकवादी हमलाको तयारी गरेको आरोल लगाउँदै ब्ल्याक सीमा युद्ध अभ्यासको घोषणा गरेपछि युक्रेनमा त्रास फैलिएको छ ।
रोयटरले जनाएअनुसार पुटिनले क्रिमियामा अशान्ति मच्चाउन युक्रेनले प्रयास गरेको आरोप लगाएका छन् । सन् २०१४ मा पुटिनले युक्रेनबाट खोसेर क्रिमियालाई रुसमा गाभेका थिए । पुटिनले युक्रेनविरुद्ध युद्धकालमा जस्तै चर्को आरोप लगाउन थालेकाले उनले पृथकतावादीलाई उकासेर युक्रेनमा अशान्ति मच्चाउने योजना बनाएको हुनसक्ने सन्देह गरिएको छ । रुसका उच्च सैनिक अधिकारीहरूको बिहीवार बसेको बैठकमा 'स्थल, जल र वायु सीमामा आतंकवाद प्रतिरोधी तयारी'को समीक्षा गरेका थिए ।
रोयटरका अनुसार युक्रेनले भने पुटिनका आरोपलाई अस्वीकार गर्दै त्यसलाई युक्रेनमाथि आक्रमण गर्न बनाइएको बहाना भनेको छ । युक्रेनका राष्ट्रपति पेट्रो पोरोसेन्कोले क्रिमियासँग सीमा जोडिएको र पूर्वी युक्रेनमा सुरक्षा सर्तकता बढाउन निर्देशन दिएका छन् ।
अमेरिकी विदेश मन्त्रालयकी प्रवक्ता एलिजाबेथ ट्रुडोले अमेरिकाले स्थितिलाई गम्भीरतापूर्वक नियालेको बताउँदै दुवै पक्षलाई संयमित हुन आग्रह गरेको बताएकी छन् । युक्रेनको अनुरोधमा राष्ट्र संघीय सुरक्षा परिषद्को बैठक बसेको थियो । बैठमा युक्रेनका प्रतिनिधिले रुसले ४० हजार फौज 'अत्यन्त गलत नियत'ले सीमामा तैनाथ गरेको आरोप लगाएको रोयटरले उल्लेख गरेको छ ।
प्रकाशित मिति: शुक्रबार, साउन २८, २०७३ ०८:५०
प्रतिक्रिया दिनुहोस्