काठमाडौं । विश्वभर महामारीका रुपमा फैलिएको कोरोना भाइरसका कारण नौ महिना यता कुनै पनि प्रतियोगिता नभएको क्रिकेट अब सुरु हुने भएको छ । लामो समय मैदान बाहिर रहेका खेलाडीलाई मैदान प्रवेशका लागि ट्राइ–सिरिजको आयोजना गरिने भएको छ । वागमती क्रिकेट संघ र जिल्ला क्रिकेट संघ चितवनको अगुवाईमा नेपाली राष्ट्रिय क्रिकेट टोलीका खेलाडी र घरेलु क्रिकेट प्रतियोगिता उत्कृष्ट प्रदर्शन गरिरहेका खेलाडीहरुले ट्राइ–सिरिजमा भाग लिनेछन् ।
चितवनमा निर्माणाधीन गौतम बुद्ध अन्तराष्ट्रिय क्रिकेट रंगशालाको नमुना ग्राउण्डमा गौतम बुद्ध कप प्रतियोगिताको आयोजना हुने भएको हो । कोरोना भाइरसका कारण देशभर ठप्प बनेको क्रिकेट पुनः सञ्चालनमा आउने भएपछि खेलाडीहरु भने उत्साहित छन् ।
नेपाली राष्ट्रिय क्रिकेट टोलीका कप्तान ज्ञानेन्द्र मल्ले पुनः क्रिकेट खेल सुरु हुने कुराले खेलाडीहरुलाई उत्साहित बनाएको बताएका छन् । उनले लामो समय खेलाडीहरुले कुन प्रतियोगिताबाट क्रिकेटको सुरुआत गर्ने र कसरी पुनः मैदान फर्कने भन्ने विषयमा अब सोच्नु पर्ने अवस्था नभएको बताएका छन् ।
“लामो समयपछि क्रिकेटमा फर्कने कुराले निकै उत्साहित बनाएको छ । यसले खेलाडीहरुलाई कुन प्रतियोगिता या कुन माध्यमबाट क्रिकेटमा फर्कने भन्ने कुराबाट पनि छुटकारा दिएको छ । हामी सबै प्रतियोगिताका लागि उत्साहित छौ,” मल्लले बाह्रखरीसँग भने ।
धुर्मुस–सुन्तली फाउन्डेसनको पहलमा निर्माणाधीन गौतम बुद्ध अन्तराष्ट्रिय क्रिकेट मैदानमा हाता भित्र रहेको नमुना मैदानमा कोरोना भाइरसको महामारीपछि पहिलो क्रिकेट प्रतियोगिता गौतव बुद्ध कप सञ्चालन हुने भएको हो ।
प्रदेश क्रिकेट संघ र जिल्ला क्रिकेट संघको सक्रियतामा प्रतियोगिता सञ्चालन हुन लागेको हो । आउदो मंसिर २७ गतेबाट मंसिर ३० गतेसम्म प्रतियोगिता हुने छ ।
सहभागि खेलाडीहरुलाई तीन टिममा विभाजन गरि तीन टोलीको राउन्ड रोविन लिग पनि शीर्ष दुई टोलीले फाइनलमा प्रतिस्पर्धा गर्ने भएका छन् । प्रतिगिताले खेलाडीलाई मैदान फर्काउने विषयसँगै निर्माणाधीन रंगशालाको लागि केही आर्थिक सहयोग पनि हुने कप्तान मल्लले बताए ।
प्रतियोगिताको फम्र्याट टि–ट्वान्टी हुने या एकदिवसीय हुने भन्ने कुरा मैदान र पिचको अवस्था हेरेर हुनेछ ।
प्रतियोगिताको आयोजनाको जिम्मेवारी क्विन्स इभेन्ट म्यानेजमेन्टले पाएको छ । प्रतिगिताका लागि आर्थिक सहयोग भने वागमती प्रदेश र भरतपुर उप–माहानगर पालिकाले गर्नेछन् ।
निर्माणाधीन मैदानको हाताभित्र निर्माण भइरहेको नमुना क्रिकेट मैदानमा तीन वटा पिच तयार पारिएको छ । ६० याड नाप रहेको मैदानलाई भविश्यमा प्रशिक्षणका लागि प्रयोग गरिने छ ।
गत बिहीबारदेखि राष्ट्रिय टोलीको बन्द प्रशिक्षणमा रहेका नेपाली खेलाडी प्रतियोगिताका लागि निकै उत्साहित छन् । प्रतियोगिताले बन्द प्रशिक्षणमा रहेका खेलाडीलाई पनि केही राहत मिल्ने छ ।