गजल – १

पैसा पैसा भन्दाभन्दै जिन्दगी सकिन्छ ।
     यताउता कन्दाकन्दै जिन्दगी सकिन्छ ।

     कति गर्नु काम मात्र रापिलो घाममा,
     बाँझो खेत खन्दाखन्दै जिन्दगी सकिन्छ ।

     कहाँ कहाँ मिलाउनु बोझिलो हिसाब,
     एक दुई गन्दागन्दै जिन्दगी सकिन्छ ।

     खालि भलो चिताउनु रासाको स्वभाव,
     भलाद्मी बन्दाबन्दै जिन्दगी सकिन्छ ।

० ० ०

गजल – २    
                                
खोज्नु परे माया जवानीमा खोज्नू !
     खोज्नु परे दसी कहानीमा खोज्नू !

     बग्नु बग्यो सारा बाढीबीच पर्दा,
     खोज्नु परे खेत कटानीमा खोज्नू !

     कति मास्यौ कति वन जति सबै,
     खोज्नु परे रुख फँडानीमा खोज्नू !

     जस्ले गर्यो युध्द उसैलाई सोध्नू !
     खोज्नु परे ज्यान खरानीमा खोज्नू !

     छैन ‘रासा’ सित दरबार भव्य,
     खोज्नु परे घर एकानीमा खोज्नू !