काठमाडौं । लामो समयको कोरोनाकालपछि अखिल नेपाल फुटबल संघ (एन्फा) ले अन्तर्राष्ट्रिय फुटबलमा नेपाली टोलीलाई सहभागी गराउने प्रयास गर्यो । बंगलादेशसँग दुई अन्तर्राष्ट्रिय मैत्रीपूर्ण खेलको मिति तय गर्दै ३४ खेलाडीलाई बन्द प्रशिक्षणका लागि दसैँको भोलिपल्ट काठमाडौं बोलायो । बोलाइएका सबै खेलाडी बन्द प्रशिक्षणमा सहभागी भए ।
नेपालमा एक साता बन्द प्रशिक्षणका क्रममा नेपाली राष्ट्रिय फुटबल टोलीको दुईपटक कोरोना परीक्षण गरिएको थियो । पहिलोपटकको कोरोना परीक्षणमा पाँच खेलाडीलाई कोरोना संक्रमण देखिँदा दोस्रो परीक्षणमा थप दुई खेलाडीमा संक्रमण देखियो । मैत्रीपूर्ण खेलका लागि बंगलादेश प्रस्थान गर्नुअघि भरपर्दा मिडफिल्डर रोहित चन्द चोटका कारण खेल्न नसक्ने भएपछि टोली बाहिरै रहे । उनीलगायत आठ खेलाडी विभिन्न कारण बंगलादेश भ्रमणबाट वञ्चित भए । बन्द प्रशिक्षणमा बोलाइएका ३४ खेलाडीबाट आठ खेलाडी बंगलादेश जान नसक्ने भएपछि २६ खेलाडी बंगलादेश जानुपर्ने हो । तर, यहाँ नयाँ अनुहारलाई टोलीमा राख्दै २५ खेलाडीसहितको नेपाली टोली अन्तर्राष्ट्रिय मैत्रीपूर्ण दुई खेलका लागि बंगलादेशतर्फ लाग्यो ।
त्यसअघि २६ जनाबाट खेलाडी छनोट गर्दा एक खेलाडी मात्र टोलीबाट बाहिरिएका थिए । छनोटमा २६ खेलाडीबाट बाहिरिने एक्ला खेलाडी हुन स्ट्राइकर आशिष लामा । स्ट्राइकरको अभाव रहेका बेला सबैभन्दा लयमा रहेका स्ट्राइकर नै टोलीबाट बाहिरिनु नेपाली फुटबलका लागि आफैंमा दुखद हो ।
आशिष गत वर्षको सहिद स्मारक ‘ए’ डिभिजन लिगका शीर्ष गोलकर्ता हुन् । उनले लिगका १३ खेलमा ९ गोल गरेका थिए । लिगका दौरान हेडिङमा सबैभन्दा चुस्त देखिएका आशिष बक्सभित्र पनि त्यति नै चतुर थिए । बक्स बाहिर पनि प्रहार गर्न माहिर आशिष पुनः एकपटक राष्ट्रिय टोलीको जर्सीको प्रतीक्षमा थिए । तर, उत्कृष्ट हुँदा-हुँदै पनि उनी टोलीबाट विनाकारण बाहिरिने एक्ला खेलाडी बने ।
सबैभन्दा लयमा देखिएका स्ट्राइकर आशिषलाई नेपाली फुटबल टोलीमा भरपूर प्रयोग गर्न सक्ने अवस्था थियो । लिगमा उत्कृष्ट देखिएका आशिषको लयलाई बंगलादेशसँगको मैत्रीपूर्ण खेलमा मापन गर्ने सुन्दर अवसर थियो । यो खेलमा उनको लय मापन गर्दै आउने खेलका लागि राष्ट्रिय टोलीमा आशिषको भविष्य निर्धारण हुन सक्थ्यो । तर, राष्ट्रिय टोलीको जर्सीको पर्खाइमा रहेका आशिषको सपना पुनः केही पर धकेलिएको छ ।
बंगलादेशसँगको मैत्रीपूर्ण खेलका लागि स्ट्राइकरमा भरत खवास, नवयुग श्रेष्ठ, जर्ज प्रिन्स कार्की र विमल रानालाई टोलीमा समावेश गरिएको थियो । टोलीमा रहेका भरत र विमल इन्जर्ड (घाइते) थिए । इन्जर्ड रहेका भरत लयमा थिएनन् भने उनले पछिल्लो खेलहरुमा राष्ट्रिय टोलीका लागि गोलसमेत गर्न सकेका थिएनन् । भरतले पछिल्लो समय राष्ट्रिय टोलीका लागि ६ सेप्टेम्बर २०१८ मा बंगलादेशमा भएको साफ च्याम्पियनसिपमा भुटानाविरुद्ध गोल गरेका थिए । भुटानलाई ४-० ले पराजित गरेको खेलको ७९औं मिनेटमा भरतले गोल गर्दै उनले राष्ट्रिय टोलीका लागि आफ्नो दसौ गोल गरेका थिए ।
त्यस्तै अर्का स्ट्राइकर नवयुग र जर्ज प्रिन्स पनि लयमा थिएनन् । नियमित टोलीमा स्थान बनाउँदै आए पनि नवयुगले स्कोर गर्न भने सकिरहेका थिएनन् । उनले पनि पछिल्लो समय २०१८ को साफमा गोल गरेका थिए । बंगलादेशविरुद्धको खेलमा नेपालले २-० को जित निकाल्दा नवयुगले खेलको अन्तिम मिनेटमा गोल गरेका थिए । यो राष्ट्रिय टोलीका लागि गरेको नवयुगको छैटौं गोल हो ।
त्यस्तै विमल र जर्ज प्रिन्सले भने हालसम्म नेपाली टोलीका लागि कुनै गोल गर्न सकेका छैनन् । लिगका सुरुवाती केही खेलमा गोल गरेका विमलले त्यसपछिका खेलमा भने गोल गर्न सकेका थिएनन् । यता जर्ज प्रिन्स भने लिगका पूरै खेलमा लयबाहिर थिए । तर, लिगका दौरान आशिष प्रशिक्षकहरुले मूल्याङ्कन गरेका स्ट्राइकरमध्येका पहिलो थिए । उनको टोलीले राम्रो प्रदर्शन गर्न नसके पनि लिगमा उनले भने स्कोर गरिरहेका थिए ।
मैत्रीपूर्ण खेलमा लागि अर्का भरपर्दा युवा स्ट्राइकर विमल घर्तीमगर र अभिषेक रिजाल पनि टोलीमा थिएनन् । दुई उत्कृष्ट स्ट्राइकर टोलीमा नहुँदा उनको स्थानमा आशिषलाई प्रयोग गर्न सकिने थियो । तर, बन्द प्रशिक्षणका क्रममा आशिषका रुममेट अभिषेकलाई कोरोना देखिएपछि उनलाई पनि बंगलादेश टुरबाट बाहिर राखिएको थियो । आशिषको दुवैपटकको कोरोना परीक्षण भने नेगेटिभ आएको थियो ।
यता कोरोना संक्रमित खेलाडी गोलरक्षक विकेश कुथूका रुममेट विकास खवास भने टोलीमा सहभागी भए । बन्द प्रशिक्षणका क्रममा रुममेटलाई कोरोना संक्रमण देखियो भन्दै बंगलादेश टुरबाट आशिष रोकिँदा विकास किन रोकिएनन् भन्ने विषयले अर्को प्रश्न उठाएको छ । बंगलादेश जानुअघि गरिएको कोरोना परीक्षणअघि विकेशलाई ज्वरो आएको थियो । विकेशलाई ज्वरो आएको भन्दै परीक्षण गरिएको एक रातअघि छुट्टै कोठामा राखिएको थियो । कोरोना परीक्षणअघि एक रात विकेशलाई छुट्टै रुममा राखिएको भन्दै विकासलाई टोलीमा समावेश गरिएको थियो । तर, त्यही अवस्थामा आशिषले भने अवसर पाएनन् ।
फुटबल विश्लेषक सन्जीव मिश्रले मेडिकल टिमले नै टोलीबाट बाहिर राखेकाले अवसर नपाएको बताए । “उनी एउटै बेडमा सुतेका, एउटै थालमा खाएका अर्का स्ट्राइकर अभिषेक रिजाललाई कोरोना संक्रमण भएको थियो । अनि मेडिकल टिमले आशिषलाई शत्प्रतिशत कोरोना संक्रमण हुने ठोकुवा गरेपछि उनलाई टोलीबाट बाहिर राखिएको थियो,” मिश्रले भने । तर, त्यसपछिको परीक्षणमा पनि आशिषलाई संक्रमण देखिएको थिएन । एक साता होटेलको क्वारेन्टिनमा बसेपछि गरिएको परीक्षणमा आशिषको रिपोर्ट नेगेटिभ आएको थियो ।
“आशिष मिहिनेती खेलाडी हो । ऊ राम्रो छ । उसलाई अर्को विकल्पको स्ट्राइकरका रुपमा कोचले प्रयोग गर्न सक्थे । किन भने लिगमा ऊ विदेशी प्रशिक्षकको नजरमा परेको खेलाडी थियो,” मिश्रले भने, “हामीले आशिषलाई मैत्रीपूर्ण खेलमा प्रयोग गर्न सक्थ्यौं । यस खेलमा प्रशिक्षकले उनको लिगको प्रदर्शनलाई मापन गर्दै अर्को खेलमा लागि तयार गर्न सकिने थियो । तर, त्यसो हुन सकेन । उनी टोलीमा भएको भए खेल परिवर्तन हुन पनि सक्थ्यो । अर्को कुरा कोचले पनि एक नयाँ खेलाडी र नयाँ स्ट्राइकरलाई प्रयोग गर्न सक्थे ।”
1628253175.jpg)
