काठमाडौं । तेल चोर्न ट्यांकरमा फल्स सिलिङ राख्‍ने वीर बेताल आशीर्वाद कम्पनीलाई नेपाल आयल निगमले १५ लाख रुपैयाँ जरिवाना गराएको छ । चोरी गर्ने मनसायले चेम्बरभित्र पाता वेल्डिङ गरेर अर्को चेम्बर राख्‍ने कम्पनीलाई निगमले तत्कालका लागि सो रकमबराबरको जरिवाना गराएको हो ।

कम्पनीका नाममा रहेका दुईवटा ट्यांकरमा यस्तो कार्य गरेको पाइएको हो । कम्पनी प्रज्वलराज भट्ट, दीपेन्द्रबहादुर बम र सदेन व्याञ्‍जनकारका नाममा छ ।

निगमको वाग्मती प्रादेशिक कार्यालय थानकोटमा इन्डियन आयल कर्पोरेसनको बरौनी रिफाइनरीबाट पेट्रोल आयात गरिएको २०/२० हजार लिटर क्षमताको ना.२ख ३६३९ र ना.७ख २९९५ लाई डिपोमा कार्यरत कर्मचारीहरुबाट खाली गरी जाँच गर्ने क्रममा मापदण्डविपरीत थप अर्को फल्स चेम्बर जडान गरेको भेटाएका थिए । निगम कर्मचारीलाई सुराकीले यसबारे जानकारी दिएका हुन् ।

प्रारम्भिक जाँचमा यस्तो पाइए पनि निगमले विनियमावलीअनुसार कारबाही प्रक्रिया अघि बढाएको हो । निगमका प्रवक्ता विनीतमणि उपाध्यायले प्रचलित कानुनअनुसार थप कारबाही गर्न गुणस्तर तथा नापतौल विभालाई जानकारी गराएको जानकारी दिए । उनका अनुसार विभागले गाडी सिल गरे थप थप अध्ययन गरिरहेको छ ।

उपाध्यय भन्छन्, “ट्यांकरको बाहिरबाट हेर्दा फल्स सिलिङ सहजै देखिँदैन । तर, ट्यांकर खाली गर्ने क्रममा अर्को चेम्बर पाइएको हो ।” यो कार्य पूर्ण रुपमा तेल चोर्ने अभिप्रायले गरिएको उनको भनाइ छ ।

-फाइल तस्बिर