काठमाडौं । रत्नपार्कका रुपमा परिचित ‘शंखधर उद्यान’ मा शंखधर साख्वासँगै पद्मरत्न तुलाधरको शालिक राखिने भएको छ । काठमाडौं महानगरपालिकाले साख्वा र तुलाधरको शालिक पार्कभित्र राख्न लागेको उपमेयर हरिप्रभा खड्गीले जानकारी दिइन् । उनका अनुसार मंसिर ६ गते शालिक अनावरण हुने मिति तय भएको छ ।
“उहाँहरुको शालिक तयार भइसकेको छ । ६ गते पार्कभित्र राख्ने महानगरपालिकाको तयारी छ,” उनले भनिन् ।
साख्वा नेपाल संवतका प्रवर्तक र राष्ट्रिय विभूति समेत हुन् । ०५६ साल मंसिर ३ गते उनलाई राष्ट्रिय विभूति घोषणा गरिएको थियो । साख्वाले घरमा ल्याएको बालुवा सुन भएपछि त्यही बेचेर जनतालाई ऋणमुक्त गराएको भन्दै शंखधर दानी व्यक्ति रहेको किंवदन्ती प्रचलित छ । वामपन्थी राजनीतिज्ञ रहेका तुलाधर भने नेपाल संवतलाई राष्ट्रिय मान्यता दिलाउन आन्दोलन गरेको नेपालभाषा मंका खलः नामक संस्थाका अध्यक्षसमेत थिए ।
उनको ०७५ मंसिर १८ गते निधन भएको थियो । ०१८ सालमा तत्कालीन रानी रत्नराज्यलक्ष्मी शाहको नाममा सो पार्कको नाम रत्नपार्क राखिएको थियो । स्थानीय तहको चुनावपछि काठमाडौं महानगरले सो पार्कको नाम शंखधर उद्यान राखेको थियो । सोही उद्यानभित्र साख्वा र तुलाधरको शालिक राख्न लागिएको छ । ०६२–६३ को जनआन्दोलनपछि राजतन्त्र अन्त्यसँगै राजा रानीका नाममा रहेका सडक, क्याम्पस र पार्कको नाम परिवर्तनको लहर नै चलेको थियो । विभिन्न स्थानमा रहेका राजारानीको शालिकहरु तोडफोड नै गरिएको थियो ।
तर, रत्नपार्कको नाम भने यथावत् नै थियो । गणतन्त्रको आएको १२ वर्षपछि अर्थात ०७५ सालमा काठमाडौं महानगरपालिकाले रत्नपार्कको नाम परिवर्तन गर्दै शंखधर उद्यान राखेको थियो । पहिला निःशुल्क प्रवेश गर्न पाइने रत्नपार्क शान्ति उद्यान बनेसँगै शूल्क तिरेर मात्र प्रवेश दिने व्यवस्था गरिएको छ । अहिले सर्वसाधारणले पैसा तिरेर मात्र पार्कभित्र प्रवेश गर्न पाउँछन् ।
दुई शालिक निर्माणको लागि महानगरपालिकाले करिब ३० लाख रुपैयाँ खर्च गर्ने जनाएको छ ।