बीबीसी । पूर्वराष्ट्रपति बाराक ओबामाले वरिष्ठ अमेरिकी रिपब्लिकनहरुले नै चुनावमा धाँधली भएको भन्ने ट्रम्पको आधारहीन दाबीलाई समर्थन गर्नुले देशको प्रजातान्त्रिक प्रणालीलाई कमजोर तुल्याएको गुनासो गरेका छन् ।

सीबीएस न्युजसँगको अन्‍तर्वार्तामा उनले राष्ट्रपति निर्वाचनमा डेमोक्रेटिक उमेदवार जो बाइडेनले स्पष्ट जित हासिल गरेको पनि बताएका हुन् । अमेरिकी मिडियाले गत साता नै यससम्बन्धी आधिकारिक समाचार सार्वजानिक गरेका थिए । तर उता ट्रम्पले चाहिँ मतगणनामा जालझेल भएको भनि कानुनी प्रक्रिया अघि बढाउने बताइरहेका छन् । उनको टिमले यससम्बन्धी कुनै प्रमाण दिएका छैनन् ।

ओबामाका अनुसार ट्रम्पलाई हार्न नपर्ने भएकाले नै उनले यस किसिमले निर्वाचनमा धाँधली भएको गलत आरोप लगाएर अफवाह फैलाइरहेका छन् । उनले थप भनेका हुन्, “मलाई के कुराको बढी चिन्ता लागेको छ भने अन्य रिपब्लिकन अधिकारीहरु, जसले यो कुरालाई राम्ररी बुझेका छन्, उनीहरुले समेत यो अफवाहलाई जारी राखिरहेका छन् र समर्थन जनाइरहेका छन् । यसले बाइडेन प्रशासनलाई मात्र प्रभावित नपारेर पूरै प्रजातान्त्रिक प्रणालीलाई नै कमजोर तुल्याइरहेको छ जुन अत्यन्तै जोखिमपूर्ण मार्ग हो ।”

हाल ओबामा आफ्नो नयाँ आत्मकथा पुस्तकको तयारी गरिरहेका छन् जुन आगामी नोभेम्बर १७ मा सार्वजानिक हुँदै छ । त्यसमा उनले ह्वाइटहाउसमा आफूले बिताएको समयबारे लेखेका छन् । सञ्‍चारमाध्यम सीएनएनको रिपोर्टअनुसार ओबामाले त्यसमा ‘ट्रम्प एक अश्‍वेत व्यक्तिले अमेरिकाको नेतृत्व गरी शक्तिमा आएको भनि मानिसहरुमा त्रास फैलाएर राष्ट्रपतिको पदसम्म आइपुगेको’ बताएका छन् ।