काठमाडौं । सत्तारूढ नेपाल कम्युनिस्ट पार्टी (नेकपा)ले शुक्रबार अपराह्न ४ बजे सचिवालयको बैठक बोलाएको छ । भोलिको सचिवालय बैठकका लागि रणनीति तय गर्न पार्टी अध्यक्ष पुष्पकमल दाहाल प्रचण्डसहितका नेताहरू खुमलटारमा अनौपचारिक बैठक बसेका छन् ।

अपराह्न बसेको बैठकमा उपाध्यक्ष वामदेव गौतम उपस्थित थिएनन् । पार्टी अध्यक्ष पुष्पकमल दाहाल प्रचण्डले सचिवालय सदस्यहरूलाई छुट्टाछुट्टै भेटेर भोलि कसरी प्रस्तुत हुने भनेर छलफल गरेको एक नेताले जानकारी दिए ।

“सबै सामूहिकरूपमा बसेको होइन । अध्यक्ष कमरेडले सचिवालयका सदस्यहरूलाई छुट्टाछुट्टै भेट्नुभएको हो,” एक नेताले भने ।

अध्यक्ष प्रचण्डसँग छलफल गर्न वरिष्ठ नेता झलनाथ खनाल, माधवकुमार नेपाल र प्रवक्ता नारायणकाजी श्रेष्ठ बिहीबार अपराह्न खुमलटार पुगेका थिए । उपाध्यक्ष वामदेव गौतमलाई साँझ निम्त्याइएको ती सदस्यको जिकिर छ ।

त्यस्तै अध्यक्ष प्रचण्डले स्थायी कमिटी सदस्यहरूसँग पनि छुट्टाछुट्टै परामर्श गरेका छन् । अध्यक्ष प्रचण्डको बोलावटमा सुरेन्द्र पाण्डे, पम्फा भुसाल र जनार्दन शर्मा पनि खुमलटार पुगेको स्रोतको भनाइ छ । 

ठूलो रस्साकस्सीपछि पार्टी अध्यक्ष तथा प्रधानमन्त्री केपी शर्मा ओली सचिवालय बैठक बोलाउन राजी भएका थिए । गत कात्तिक २२ गते बहुमत सचिवालय सदस्यले बैठकको सहमतिका लागि पत्र बुझाएको भए पनि ओली तत्पर थिएनन् ।

प्रधानमन्त्री ओलीले सहमति नदिए प्रचण्डले कार्यकारी अधिकार प्रयोग गरी बैठक बसाउने तयारी गरेपछि र बिहीबारका लागि आह्वान नै गरेपछि महासचिव विष्णु पौडेलले दुवै अध्यक्षसँगको परामर्शमा सचिवालय डाकेका हुन् ।

फाइल तस्बिर ।