बेइजिङ । चीनले हङकङका प्रजातन्त्रवादी सांसदहरुले सामूहिक राजीनामा दिएर खुला चुनौती दिएको बताएका छन् । चीनले चार प्रजातन्त्रवादी सांसदलाई पदबाट हटाउन बाध्य गरेपछि अन्य १५ सांसदहरुले सामूहिक राजीनामा दिएका हुन् ।
चीनले राष्ट्रिय सुरक्षाका जोखिम ल्याउने राजनीतिज्ञहरुलाई बर्खास्त गर्न पाउने अधिकारसहितको नयाँ व्यवस्था लागु गरेपछि बुधबार प्रजातन्त्र समर्थित चार सांसदहरुलाई बर्खास्त गरिएको थियो ।
उनीहरुलाई बर्खास्त गरेपछि विरोधस्वरुप १५ जना सांसदहरुले राजीनामा दिएका हुन् । चीनले हङकङका विपक्षीद्वारा सामूहिक राजीनामाको घोषणाको कदमलाई ‘तमाशा’ र ‘खुला चुनौती’ को संज्ञा दिएको छ ।
चीनले यस्तो कदमले हङकङको स्वयात्तताको उल्लंघन भएको आरोप लगाएको छ । सन् १९९७ मा बेलायतले चीनलाई हस्तान्तरण गरेपछि हङकङको संसद पहिलोपटक विपक्षीविहीन भएको छ । चीनले पछिल्ला दिनमा हङकङको स्वतन्त्रता सीमित गर्ने प्रयास गरिरहेको आरोप लाग्दै आएको छ ।
चार सांसदलाई बर्खास्त गरिनु त्यसको पछिल्लो प्रयास रहेको विज्ञले बताएका छन् । हङकङ चीनकै भाग भए पनि त्यहाँ स्वतन्त्र स्थानीय सरकार रहेको छ ।
तर सांसदको राजीनामापछि डेमोक्रेटिक पार्टीका अध्यक्ष वु ची-वाईले भने, "हामी अब विश्वलाई भन्न सक्ने छैनौँ कि हामीसँग अझै पनि एक देश, दुई प्रणाली कायम छ । आधिकारिक रुपमै सो व्यवस्था मरेको छ ।" - बीबीसी