वाशिङ्टन । अमेरिकी राष्ट्रपति निर्वाचनको मतगणना ६ वटा राज्यहरुमा जारी रहेको छ । ४४ राज्यमा सम्पन्न भएको नतिजा अनुसार डेमोक्रेटिक उमेदवार जो बाइडेनले अग्रता कायम गरेका छन् ।
बाइडेनले २५३ इलेक्टोरल कलेज मत प्राप्त गरेका छन् भने सत्तारुढ रिपब्लिकन उमेदवार डोनाल्ड ट्रम्पले २१४ इलेक्टोरल कलेज मत प्राप्त गरेका छन् । अमेरिकी राष्ट्रपतिमा निर्वाचित हुनका लागि ५३८ कुल इलेक्टोरल कलेज मतमध्य २७० इलेक्टोरल कलेज मत आवश्यक पर्छ ।
बाइडेनलाई जितका लागि १७ इलेक्टोरल कलेज मत आवश्यक छ भने ट्रम्पलाई ५६ इलेक्टोरल कलेज मत आवश्यक छ । शुक्रबार साँझ उनले आफ्नो जित निश्चित भएको उल्लेख गर्दै आफूलाई काम गर्न अमेरिकी मतदाताहरुले काम गर्न जनादेश दिएको बताएका छन् ।
मतगणना जारी रहेका राज्यहरुमध्ये पेनसलभानियामा बाइडेनले २८ हजारभन्दा बढी मतले अग्रता लिएका छन् । यस राज्यमा २० इलेक्टोरल कलेज रहेका छन् । यस राज्यमा जितेमा मात्रै पनि बाइडेनको जित निश्चित छ ।
त्यसैगरी एरिजोनामा पनि बाइडेनले २९ हजारभन्दा बढी मतले अग्रता कायम गरेका छन् । नेवाडामा पनि बाइडेनले नै अग्रता कायम गरेका छन् । उनले नेवाडामा २२ हजार ६५७ मतले अग्रता लिएका छन् ।
जर्जियामा पनि बाइडेन ७ हजार २४८ मतले अघि रहेका छन् । अधिकारीहरुले जर्जियामा साँघुरो अग्रता भएका कारण पुन: मतगणना गरिने भएको छ ।
त्यसैगरी अलास्का र नर्थ क्यारोलिनामा भने ट्रम्पले अग्रता कायम गरेका छन् । - बीबीसी