काठमाडौं । अमेरिकामा सम्पन्न राष्ट्रपति निर्वाचनको मतगणना जारी छ । ब्याटलग्राउण्ड राज्यहरु अलास्का, एरिजोना, नर्थ क्यारोलिना, नेवाडा, जर्जिया र पेन्सलभेनियाको अन्तिम मत परिणाम आउन बाँकी छ ।
मतगणना जारी रहेका राज्यहरुमा एरिजोना, नर्थ क्यारोलिना, नेवाडा र जर्जियामध्ये कुनै दुई राज्यमा जिते डेमाक्रेटिक उमेदवार जो बाइडेन अमेरिकाका आगामी राष्ट्रपति बन्ने छन् । उनले पेन्सलभेनियामा मात्रै जिते पनि अमेरिकाको आगामी राष्ट्रपति बन्ने निश्चित छ ।
बाइडेनले जर्जियामा महत्वपूर्ण अग्रता कायम गरेका छन् ।
उनका प्रतिद्वन्द्वी रिपब्लिकन उमेदवार डोनाल्ड ट्रम्पले मतगणना जारी रहेका राज्यहरु मध्ये एरिजोना, नर्थ क्यारोलिना, नेवाडा र जर्जियामा कुनै तीन राज्यसँगै पेन्सलभानियामा जित हात पारे दोस्रो कार्यकालका लागि राष्ट्रपति बन्ने छन् ।
ट्रम्पले एरिजोना, नेवाडा, नर्थ क्यारोलिना र पेन्सलभेनिया राज्यमा जित निकाले मत परिणाम बराबरी हुने छ ।
अमेरिकाका ५० राज्यमध्ये ४४ राज्यको मतगणना सम्पन्न भइसकेको छ । ४४ राज्यको मतगणनाको मत परिणामअनुसार डेमोक्रेटिक उमेदवार जो बाइडेनका पक्षमा दुई सय ५३ इलेक्टोरल कलेज र रिपब्लिकन उमेदवार डोनाल्ड ट्रम्पको पक्षमा दुई सय १४ इलेक्टोरल कलेज आएका छन् ।
अमेरिकामा राष्ट्रपतिमा निर्वाचित हुनका लागि पाँच सय ३८ मध्ये दुई सय ७० इलेक्टोरल कलेज मत चाहिन्छ । - बीबीसी
