मुम्बई । मुम्बई प्रहरीले रिपब्लिक टीभीका सम्पादक अर्नब गोस्वामीलाई बुधबार घरबाटै पक्राउ गरेको छ । समाचार एजेन्सी एएनआईका अनुसार गिरफ्तारीका क्रममा आफ्नी पत्नी, छोरा र सासू-ससुरामाथि समेत प्रहरीले हातपात गरेको गोस्वामीको आरोप छ ।
यसैबीच रिपब्लिक टीभी च्यानलका केही स्क्रिनसट यतिबेला सामाजिक सन्जालमा भाइरल बनाइएका छन् जसमा प्रहरी गोस्वामीको घरमा पसेर त्यहाँ केही झडप भएको देख्न सकिन्छ । सो भिडियोमा उनलाई भ्यानमा राखेर पुलिसले लैजाँदै गरेको देखिएको छ । रिपब्लिक टीभीले दाबी गरेअनुसार गोस्वामीलाई पहिले नै बन्द भइसकेको मुद्दाका लागि गिरफ्तार गरिएको छ । जसकारण घटना विवादास्पद बन्न पुगेको हो ।
मन्त्रीहरुलगायत केही हाई-प्रोफाइल व्यक्तिहरुले अहिले यस घटनाप्रति निन्दा व्यक्त गर्दै सत्ताको दुरुपयोग भएको आरोपसमेत लगाइरहेका छन् । प्रहरीले भने के कारणले उनी गिरफ्तार भएको भन्ने आधिकारिक जानकारी दिएको छैन । यस घटनासँगै अहिले ट्विटरमा अर्नब गोस्वामीको नाम शीर्ष स्थानमा ट्रेन्ड भइरहेको छ ।
यता अभिनेत्री कंगना रनौतले पनि यससम्बन्धी ट्विटरमार्फत प्रतिक्रिया दिँदै विरोध जनाएकी छन् । केन्द्रीय सूचना प्रशारणमन्त्री प्रकाश जावडेकरले यो घटनाले आपत्कालीन समयको याद दिएको भन्दै गम्भीर चिन्ता व्यक्त गरेका छन् । मुम्बईमा प्रेस पत्रकारितामाथि भएको यस किसिमको हमलालाई उनले निन्दनीय ठहर गरेका हुन् ।
केन्द्रीय रेलमन्त्री पीयूस गोयलले पनि यो घटना प्रेस स्वतन्त्रतामाथिकै ठूलो हमला भएको भन्दै विरोध जनाएका छन् । उनले ट्विटरमार्फत गोस्वामीलाई त्यसरी पक्राउ गर्नु सत्ताको दुरुपयोग गरिएको स्पष्ट उदाहरण भएको बताएका हुन् ।
अर्कोतर्फ शिवसेना सांसद सञ्जय रावतले चाहिँ अर्नब गोस्वामीविरुद्ध जारी कारबाहीको महाराष्ट्र सरकारसँग कुनै सम्बन्ध नरहेको दाबी गरेका छन् । सरकारले कहिल्यै पनि बदलाको भावनाले कारबाही नगर्ने हुनाले पनि घटना कुनै हिसाबले अराजक नभएको उनले बताएका हुन् ।
भारतीय पत्रकार अर्नव गोस्वामी पक्राउ
अर्का मन्त्री रविशंकर प्रदादले चाहिँ गोस्वामीको गिरफ्तारीसम्बन्धी महाराष्ट्र सरकारमाथि प्रश्न उठाएका छन् । उनले यो घटनालाई चिन्ताजनक र अनुचित ठहर गरेका हुन् । यता केन्द्रीयमन्त्री स्मृति इरानीले पनि ट्विट गर्दै यस मुद्दामा अर्नवको साथ नदिनेहरु दमनको पक्षमा भएको बताएकी छन् । उनका कुराहरुसँग सहमत नभए पनि प्रेस स्वतन्त्रताको विषयमा चुपचाप बस्नेहरु वास्तवमै फाँसीवादका समर्थक भएको उनले लेखेकी छन् । -बीबीसी
