एजेन्सी । अहिले अमेरिकाका अधिकांश राज्यमा मतदान प्रक्रिया समाप्त भइसकेको छ । कतिपय राज्यमा मत परिणाम आउन थालेको अन्तर्राष्ट्रिय सञ्चारमाध्यमले जनाएका छन् ।
बाइडेन र ट्रम्प दुवैले जित सुनिश्चित गर्न स्वीङ स्टेटहरुमा अग्रता हासिल गर्नुपर्ने हुन्छ जहाँका मतदाताहरुले समर्थन गर्ने पार्टी बदलिरहने गर्दछन् । र, देशव्यापी एक्जिट पोलको नतिजा हेर्दा यसपटक अमेरिकी मतदाताहरु देशको अर्थतन्त्रलाई लिएर सबैभन्दा बढी विभाजित रहेको देखिएको छ भने आधाभन्दा बढी कोरोना महामारीबाट पनि प्रभावित भएको बताएका छन् ।
यसमा एक तिहाइ बढी मतदाताहरुले आर्थिक विषय आफूहरुका लागि सबैभन्दा महत्वपूर्ण भएको बताएका छन् र पाँच मध्ये एकले चाहिँ जातीय असामनताको मुद्दा पनि प्राथमिकतामा राखेर मत हालेको बताएका हुन् ।
झन्डै १० मध्ये एकजनाले स्वास्थ्य सेवाको नीति र हिंसा पनि पछिल्लो समय चासोको विषय बन्दै गएको स्वीकार गरेका छन् ।
तर पनि प्रायले कोरोनाभाइरसको नियन्त्रण भन्दा अर्थतन्त्र पुनः निर्माण गर्नुलाई बढी महत्व दिइ आफ्नो उमेदवार रोजेको बताएका छन् ।
त्यसैगरी आधाबढी मतदाताहरुले आफ्नो भोट गन्ती हुनेमा विश्वास जनाएका छन् । अहिलेसम्मको पोल नतिजा हेर्दा प्रमुख युद्धभूमी मानिएको फ्लोरिडामा नजिकी अन्तरले ट्रम्प बाइडेनभन्दा केही अगाडि रहेको पोलले देखाएको छ ।
यसबाहेक अन्य स्वीङ स्टेट, जर्जिया, नर्थ क्यारोलिनालगायतबाट नतिजा प्राप्त हुनै बाँकी छ । बाइडेनले फ्लोरिडाबिना अन्य क्षेत्रबाट पनि आफ्नो स्थान सुनिश्चित गर्न सक्छन् । जसकारण नतिजा अधिक प्रतिस्पर्धात्मक हुने अपेक्षा गरिएको छ ।
प्रायः मतदाताहरु मास्क लगाएरै उपस्थित भएका थिए भने सामाजिक दुरी पनि कायम गरिएको छ र मतदान प्रक्रियामा कुनै किसिमको अवरोध या हिंसा नभएको पनि बताइएको छ जसबारे यसअघि चिन्ता व्यक्त गरिएको थियो ।
विजयी घोषणा हुन भने अझै केही दिन लाग्नेछ । उक्त ऐतिहासिक नतिजाले नै हाल महामारीको चरम संकटबाट गुज्रिरहेका अमेरिकीहरुको भविष्य निर्धारण गर्नेछ जहाँ पछिल्ला केही महिनामा बेरोजगारको सङ्ख्या लाखौँ पुगेको छ भने जातीय तनाव अनि राजनीतिक गतिविधिमा पनि ठुल्ठुला उतारचढाव देखिएको छ ।
यसका साथै जलवायु परिवर्तनलगायतका केही अन्तर्राष्ट्रिय मुद्दामा पनि अमेरिकी निर्वाचनले धेरै ठूलो प्रभाव पार्नेछ ।