पेरिस । फ्रान्सको दक्षिणी सहर नाइसस्थित एउटा चर्चमा भएको चक्कु प्रहारको घटनालाई 'आतंकवादी आक्रमण' को संज्ञा दिइएको छ । उक्त चक्कु प्रहारमा तीन जनाको मृत्यु भएको थियो । 

प्रहरीले चलाएको गोली लागेका एज सन्दिग्घ आक्रमणकारीको गम्भीर अवस्था भएपछि अस्पतालमा उपचार भइरहेको छ । राष्ट्रपति इम्यानुअल म्याक्रोनले उक्त घटनालाई 'इस्लामिक आतंकवादी आक्रमण' भनेका छन् ।

घटनापछि चर्च र विद्यालयहरूको सुरक्षाको निम्ति हजारौं सुरक्षाकर्मीहरू परिचालन गरिएका छन् र राष्ट्रिय सुरक्षा सतर्कतालाई उच्च तहमा पुर्‍याइएको छ । 

नियन्त्रणमा रहेका संदिग्ध व्यक्ति केही दिनअघि ट्युनिसियाबाट युरोप पुगेका थिए । उनी फ्रान्स पुगेपछि बिहीवार बिहान रेलबाट निस पुगेको र त्यहाँ उनले कपडा फेरेको देखिएको पाइएको छ ।

ती व्यक्ति ४०० मिटर हिँडेर नोट्र-डाम चर्च गई स्थानीय समयानुसार बिहान ८:२९ मा भित्र पसेका थिए । त्यहाँ उनले एकजना वृद्धाको टाउको झन्डैझन्डै छुट्ट्याइदिएको र अर्का पुरुषको घाँटीमा प्रहार गरेको बताइएको छ ।

अर्की महिला चर्चबाट भाग्‍न सफल भइन् र एउटा मदिरालयनजिक पुगेकी थिइन् । तर घाइते भएकी उनको पनि पछि मृत्यु भएको थियो । पीडितहरू चर्चमा उपस्थित भएकै कारणले निसाना बनाइएको प्रमुख अभियोजनकर्ता रिकार्टको भनाइ छ ।

उनले भने अनुसार प्रहरी घटनास्थल पुग्दा ती व्यक्तिले खतरनाक रूपमा प्रस्तुत भए र बारम्बार "अल्लाहु अबर" (ईश्वर महान् छन्) भनेर चिच्याएका थिए । ती व्यक्तिको झोलामा दुईवटा फोन र एउटा कुरान पनि फेला परेको अधिकारीहरूले जनाएका छन् ।

प्रहरीले अहिलेसम्म ती सन्दिग्ध आक्रमणकारीको नाम पुष्टि गरेको छैन । फ्रान्स र इटलीका सञ्चारमाध्यमले आक्रमणकारीको नाम ब्राहिम आवीसावी भएको बताएका छन् ।

रिकार्टका अनुसार सन् १९९९ मा जन्मिएका उनी ट्युनिशियाली नागरिक हुन् । उनी सेप्टेम्बर २० मा युरोप पसेको बताइएको छ । - बीबीसी