काठमाडौं । इन्डियन प्रिमियर लिग (आईपीएल) टी–ट्वान्टी क्रिकेट अन्तर्गत चेन्नई सुपर किङ्सले रोमाञ्चक जित निकालेको छ । बिहीबार भएको खेलमा चेन्नईले कोलकाता नाइट राइडर्सलाई ६ विकेटले पराजित गरेको हो । 

दुबई अन्तराष्ट्रिय क्रिकेट मैदानमा कोलकाताले चेन्नईलाई जितका लागि दिएको १७३ रनको लक्ष्य चेन्नईले निर्धारित २० ओभरमा ४ विकेट गुमाउँदै १७८ रन बनाउन सफल भयो । 

चेन्नईका लागि रुतुराज गाइक्वाडले अर्धशतकीय पारी खेले । ५३ बल खेलेका उनले ६ चौका र २ छक्काको सहयोगमा ७२ रनको योगदान गरे । त्यस्तै अम्बाती रायडुले ३८ रन बनाउँदा रवेन्द्र जडेजाले ३१ रनको योगदान गरे ।

बलिङतर्फ कोकाताका लागि प्याट कमिन्स र वरुन चक्रवर्तिले समान दुई–दुई विकेट लिए । यसअघि टस हारेर पहिले ब्याटिङ गरको कोलकाताले निर्धारित २० ओभरमा ५ विकेट गुमाउँदै १७२ रन बनाउन सफल भएको थियो । 

कोलकाताका लागि नितिश रानाले अर्धशतकीय पारी खेले । ६१ बल खेलेका उनले १० चौका र ४ छक्काको सहयोगमा ८७ रन बनाए । त्यस्तै दिनेश कार्तिकले २१ रन बनाउँदा शुभम गिलले २६ रनको योगदान गरे । 

बलिङतर्फ चेन्नईका लागि लुङ्गी एन्गिडीले दुई विकेट लिए । त्यस्तै मिचेल स्टेनर, रविन्द्र जडेजा र करन शर्माले समान एक–एक विकेट लिए । 

आजको खेलमा पराजित भएसँगै कोलकाताको प्लेअफमा पुग्ने सम्भावना कमजोर भएको छ । लिगमा १३ खेल खेलेको कोलकाता १२ अंक सहित तालिकाको पाँचौ स्थानमा रहेको छ । 
जित निकालेको चेन्नई १३ खेलमा १० अंक सहित तालिकाको पुछारमा छ ।