काठमाडौं । डेमोक्रेटिक लयर्स एसोसियसन (डीएलए)ले नेपाल बार एसोसियनको निर्वाचनमा आफ्नै उमेदवार हराउन लागेको भन्दै डीएलएकै पूर्वअध्यक्षसहित केही वरिष्ठ अधिवक्तालाई संगठनबाट निष्कासन गरेको छ ।
डीएलएको अनुशासन समितिले डीएलएका पूर्व अध्यक्ष वरिष्ठ अधिवक्ता यदुनाथ खनालसहित वरिष्ठ अधिवक्ता एवं नेपाल बारका पूर्व अध्यक्षहरु हरिहर दाहाल, प्रेमबहादुर खड्कासहित अधिवक्ताहरु विजयप्रसाद मिश्र र श्रीराम दवाडीलाई निष्कासन गरेको हो ।
नेपाल बार एसोसियनको ०७५ चैत १६ गते सम्पन्न निर्वाचनमा डीएलएको नेतृत्वमा बनेको वृहत्तर लोकतान्त्रिक समूहका २५ मध्ये २२ जना उमेदबार पराजित भएका थिए ।
पराजयको कारण पत्ता लगाउन डीएलए केन्द्रिय समितिले ०७६ वैशाख १० मा समिति गठन गरेको थियो । सो समितिले साउन १२ गते प्रतिवेदन बुझाएको थियो ।
सो प्रतिवेदनले डीएलए नेतृत्वको समूहका उमेदवार पराजित हुनुमा निष्कासन गरिएका ५ जनासँग बुझ्नुपर्ने भन्दै १५ दिने स्पष्टिकरण मागिएको थियो ।
०७७ भदौ ३ गते स्पटिकरण दिन उनीहरु पाँचै जनालाई भनिएपनि स्पष्टिकरण नदिएर संस्थाको वैधानिकतालाई चुनौती दिएको र मौन रहेर जवाफ नदिउकाले आरोप पुष्टि भएको भन्दै संगठनबाट निष्कासन गरिउको अनुशासन समितिका संयोजक भरतप्रसाद खरेलले जानकारी दिएका छन् ।