काठमाडौं । नेपाली राष्ट्रिय फुटबल टोलीले बिहीबारदेखि प्रशिक्षण सुरु गरेको छ । बंगलादेशसँगको मैत्रीपूर्ण खेलका लागि नेपालले बिहीबारदेखि प्रशिक्षण सुरु गरेको हो ।
पहिलो दिनको प्रशिक्षण त्रिपुरेश्वरस्थित दशरथ रंगशालामा भएको थियो । प्रशिक्षणका लागि एन्फाले बुधबार सबै खेलाडीलाई काठमाडौं बोलाएको थियो ।
नेपालले बालगोपाल महर्जनको प्रशिक्षकत्वमा तयारी सुरु गरेको हो । मुख्य प्रशिक्षक योहान कालिन स्विडेनमा रहेका कारण एन्फाले महर्जनलाई टिम हेर्ने जिम्मेवारी दिएको थियो ।
नेपालले बङ्गलादेशसँग ढाकामा दुई मैत्रीपूर्ण खेल खेल्नेछ । ढाकास्थित बङ्गबन्धु रङ्गशालामा हुने पहिलो मैत्रीपूर्ण खेल कात्तिक २८ गते हुनेछ । दोस्रो मैत्रीपूर्ण खेल आगामी मङ्सिर २ गते हुने एन्फाले जनाएको छ ।