काठमाडौं । विश्व बैंकले नेपालका लागि ८ करोड डलरको कृषि परियोजना स्वीकृत गरेको छ । नेपालको कृषि क्षेत्रको विकास र कोभिड महामारीको आर्थिक प्रभाव न्युनीकरण गर्ने उद्देश्यले ९ अर्ब ३६ करोड रुपैयाँ बराबरको ग्रामिण उद्यम तथा आर्थिक विकास परियोजना स्वीकृत भएको बैंकले जनाएको छ । 

यो परियोजनाले स्थानीय तहमा रोजगारी सिर्जना हुने र कोभिड १९ ले पारेको आर्थिक असर न्युनीकरणमा समेत सहयोग पुर्‍याउने विश्वास विश्व बैंकको रहेको छ । कृषिका माध्यमबाट महिला उद्यमशिलताको विकासमा यो परियोजना केन्द्रित हुने विश्व बैंकले जनाएको छ ।

विश्व बैंकका लागि नेपालका कन्ट्री डाइरेक्टर फारिस हदाद जार्भोसले यो परियोजनामा काम गर्न सरकार र निजी क्षेत्रलाई अवसर दिने बताए । त्यसबाट कृषिमा नेपाल ब्राण्ड स्थापित गर्न र अन्तराष्ट्रिय रुपमा परिचित गराउन सफल हुने विश्वास व्यक्त गरे । 

चिया, कफी, फलफुल तथा जडिबुटीलाई बजारिकरण गर्न र कोभिड १९ को असरलाई कम गराउन सहयोगी हुने उनको भनाइ छ । 

यो परियोजना ६ वटा प्रदेशमा केन्द्रित हुने बैंकले जनाएको छ । प्रदेश १, २, बागमती, गण्डकी र लुम्बिनी र सुदूरपश्चिम प्रदेशमा यो परियोजना संचालन हुने विश्व बैंकले जनाएको छ । नेपालको कृषि विकास रणनीतिलाई सघाउन यो परियोजनामार्फत सहयोग गर्न लागेको बैंकले जनाएको छ ।