काठमाडौं । नेपाली राष्ट्रिय टोलीका लेग स्पिनर सन्दीप लामिछाने पछिल्लो समय विश्व क्रिकेटमा चर्चामा रहेका युवा खेलाडी हुन् । उनले विश्वस्तरमा रहेका धेरै डोमेस्टिक लिगहरुमा खेलिसकेका छन् ।
पछिल्लो समय इन्डियन प्रिमियर लिगका लागि भारतमा रहेका सन्दीप यो सिजन भने लिगमा हालसम्म खेल्न पाएका छैनन् । आईपीएको पहिलो सिजनमा खेलेका खेलहरुमा उत्कृष्ट प्रदर्शन गरेका सन्दीप दोस्रो सिजनमा पनि केही खेलमा खेल्ने अवसर पाएका थिए ।
तर यो सिजन उनले खेल्ने अवसर पाएका छैनन् । क्यरेबियन प्रिमियर लिग (सीपीएल) खेलेर फर्केका सन्दीप आईपीएलमा भने मौका पाउन सकेनन् । सन्दीप आईपीएल लगत्तै डिसेम्बरमा अस्ट्रेलियाको बिग बास लिग (बीबीएल) टी-ट्वान्टी क्रिकेट खेल्न जाने तयारीमा छन् ।
अघिल्ला दुई सिजनमा उत्कृष्ट प्रदर्शन गरेका सन्दीप यो सिजन पनि लिगमा उत्कृष्ट प्रदर्शन गर्ने योजनमा छन् । सन्दीप पछिल्ला दुई सिजनमा मेलबर्न स्टार्सबाट लिग खेल्दै आइरहेका छन् । मेलबर्न स्टार्स गत सिजनको उप-विजेता टोली पनि हो ।
विश्वभर महामारीको रुपमा फैलिएको कोरोना भाइरसको केही समय लगाएर क्रिकेट अस्ट्रेलियाले दुई महिना चल्ने बीबीएलको मिति घोषणा गरिसकेको छ । डिसेम्बरबाट सुरु हुने लिगका लागि विश्व स्तरमा उत्कृष्ट प्रदर्शन गरिरहेका खेलाडीहरुले सहभागिता जनाउनेछन् । जसमध्ये सन्दीप पनि एक हुन् । सन्दीपले मेलबर्नका लागि उत्कृष्ट प्रदर्शन गर्दै आइरहेका छन् ।
मेलबर्नलगायत अन्य टोलीले पनि सन्दीपप्रति चासो देखाएका छन् । सन्दीपका व्यवस्थापक रमन शिवाकोटीले यो सिजन सन्दीपका लागि अन्य टोलीले पनि चासो देखाएको बताएका छन् । उनले सन्दीपले यो सिजन कुन टोलीबाट खेल्ने भन्ने अझै टुङ्गो नलागेकाले केही समयपछि मात्र टिमबारे थाहा हुने बाह्रखरीलाई भने ।
“सन्दीपले यो सिजन बीबीएलमा खेल्ने टोलीको हालसम्म टुङ्गो लागेको छैन् । केही दिनमा टिमबारे थाहा हुनेछ । सन्दीपलाई मेलबर्न स्टार्सलगायत धेरै टोलीले टिममा भित्र्याउने चासो देखाएका छन्,” उनले भने ।
नयाँ संस्करणको बीबीएल डिसेम्बर ४ बाट सुरु हुने छ । बीबीएलको खेल तालिकासमेत सार्वजनिक भइसकेको छ । सन्दीपले बीबीएलमा २० खेल खेल्दै २६ विकेट लिन सफल छन् ।