काठमाडौं । बजारमा कुभिन्डोको माग कम भएपछि मूल्य पनि सस्तिएको छ ।

कोभिड संक्रमणको जोखिमका कारण मठ-मन्दिरहरु सर्वसाधारणका लागि बन्द छन् । नवरात्रिमा मन्दिर गई कुभिन्डोको विधिपूर्वक पूजाआजा गरी देवीदेवतालाई चढाउने चलन छ । तर भक्तालुहरुका लागि मठमन्दिरमा पूजाआजा गर्न रोक लगाइएपछि यस वर्षको दसैँमा कुभिन्डोको माग घटेको छ ।

कुभिन्डो खासगरी नवरात्रिको चौथो दिन कुष्माण्डा देवीको पूजा गर्न र नवमीको दिन पशु बलि नदिनेहरुले कुभिन्डो बलि दिनका लागि प्रयोग गर्ने चलन छ । तर यस वर्ष कोभिड संक्रमणका कारण मठ-मन्दिरलगायत शक्तिपीठहरुमा पूजाआजामा रोक लगाइएपछि कुभिन्डोको माग घटेको छ । माग घटेपछि मूल्य पनि घटेको हो । गत वर्ष एउटा कुभिन्डो झन्‍डै चार सय रुपैयाँमा बिक्री भएको तर यस वर्ष एक सयदेखि १५० रुपैयाँमा पनि बिक्री हुन नसकेको व्यपारीहरुले बताएका छन् ।

काठमाडौंको सुनधारा क्षेत्रमा पुग्दा व्यपारीहरुले सडकमा कुभिन्डो बिक्रीका लागि राखेको देखिन्छ भने किन्‍नेहरु देखिँदैनन् । अघिल्लो वर्ष दुई-तीन सयको संख्यामा कुभिन्डो बिक्री भएको तर अहिले १०/१५ वटा पनि बिक्री नभएको व्यवसायीहरुको गुनासो छ ।