एजेन्सी । यूईएफए च्याम्पियन्स लिग फुटबलमा स्पेनिस ला लिगा क्लब रियल मड्रिड पराजित भएको छ । घरेलु मैदानमा बुधबार राति भएको खेलमा रियल साख्तरसँग ३–२ गोलले पराजित भएको हो । 

घरेलु टोली रियललाई पराजित गर्न साख्तरका लागि टेटे र मानोर सोलोमोनले एक एक गोल गरेका थिए । एक गोल भने आत्मघाती उपहार पाएको थियो । रियलका लागि लुका मोड्रिच र भिनिसियस जुनियरले एक एक गोल फर्काए । 

खेलको २९ औं मिनेटमा पाहुना टोली साख्तरले खेलमा अग्रता लिएको थियो । कोर्नियन्कोको पासमा टेटेले गोल गर्दै साख्तरलाई अग्रता दिलाएका थिए । ३३ औं मिनेटमा रियलका डिफेन्डर राफेल भरानेले आत्मघाती गोल गरेपछि रियल खेलमा २–० ले पछि पर्यो । 

पहिलो हाफ सकिन तीन मिनेट बाँकी रहँदा सोलोमोनले गोल गरे । उनले टेटेको पासमा गोल गर्दै साख्तरलाई पहिलो हाफमा ३–० को अग्रता दिलाए । ५४ औं मिनटमा मार्सेलोको पासमा मोड्रिचले गोल गर्दै रियललाई खेलमा फर्कउने प्रयास गरे । त्यसको पाँच मिनेट नबित्दै भिनिसियसले गोल गर्दै खेल ३–२ को स्थितिमा ल्याए । तर, त्यसपछि थप गोल गर्न नसक्दा रियल साख्तरसँग पराजित हुँन पुग्यो ।

यससँगै च्याम्पियन्स लिगको समूह बी मा रहेको रियलले पहिलो खेलमा पराजित हुँदै लिगमा दुखद सुरुवात गरेको छ । यता, साख्तरले भने समूहमा तीन अंक जोड्दै सुखद सुरुवात गरेको छ ।