काठमाडौं । लगातार तेस्रो दिन पनि सेयर बजार दोहोरो अंकले बढेको छ । साताको चौथौ दिने सेयर बजार परिसूचक नेप्से १३.९४ अंकले वृद्धि हुँदा करिब १६०० अंकको नजिक पुगेको छ । बुधबार नेप्से १५९७.७१ अंकमा बन्द भएको छ ।
अब खरिद गरेको सेयरको पैसा दसैंपछि मात्रै भुक्तानी गरे हुने भएकोले बजारमा खरिद चाप बढेको छ भने बेच्नेले दसैं अगाडि पैसा नपाउने हुँदा बिक्री चाप घटेको छ । जसले गर्दा नेप्से यो साता लगातार बढिरहेको छ । सेयर खरिद अहिले गरेपछि दसैंपछि मात्रै भुक्तानी गर्दा हुने भए पनि बजार परिसूचकसँगै कारोबार रकम पनि बढ्दै गएको छ । यो साता लागेपछि एक अर्बबाट तल झरेको कारोनाबाट रकम पनि डेढ अर्बमाथि पुगेको छ ।
साताको पहिलो दिन सामान्य ओरोला लागे पनि त्यसपछि भने सेयर बजार लगातार बढिरहेको छ । बुधबार बैंकिङ समूहको सूचक बढेसँगै नेप्से पनि दोहोरो अंकले बढेको हो । तर उपसमूहका सूचकहरु भने मिश्रित रहेको छ । होटेल, हाइड्रोपावर, वित्त कम्पनी र उत्पादन समूहको सूचक ओरालो लाग्दा त्यसबाहेकको समूहको सूचक भने बढेको छ ।
बुधबार नेप्सेमा हाइड्रोपावर समूहको सूचक सर्वाधिक १.०१ प्रतिशतले घटेको छ । व्यापार समूहको सूचक भने २.१९ प्रतिशत र बजारलाई लिड गर्ने बैकिङ समूहको सूचक नै १.७१ प्रतिशतले वृद्धि हुँदा नेप्से पनि ०.८८ प्रतिशतले बढेको हो ।
नेप्सेसँगै कारोबार रकम पनि क्रमिक रुपमा बढेको छ । बुधबार नेप्सेमा २२ हजार ४८२ वटा कारोबारमा १९२ कम्पनीको ५५ लाख ९ हजार ४४८ कित्ता सेयर किनबेच हुँदा १ अर्ब ६३ करोड ३२ लाख ४६ हजारको सेयर कारोबार भएको छ । २० प्रतिशत लाभांश घोषणा गरेको एनआईसी एशिया बैंकको सेयरमा लगानीकर्ता झुम्मिएका छन् । बैंकको मात्रै २४ करोड २९ लाख ५८ हजारको सेयर किनबेच भएको छ ।
त्यस्तै कुमारी बैंकको ८ करोड ३९ लाख ३० हजारको कारोबार हुँदा कारोबार रकममा नेपाल बैंक, हिमाल दोलखा हाइड्रोपावर र ग्लोबल आइएमई बैंक अगाडि देखिएका छन् । गत साता नेप्सेमा सुचकृत भएर कारोबार सुरु भएको जनरल इन्स्योरेन्सको सेयर मुल्यमा बुधबार पनि सकारात्मक सर्किट लागेको छ । ९.८४ प्रतिशतले बढेको कम्पनीको सेयर मूल्य ५३६ रुपैयाँ पुगेको छ ।
यस्तै नेपाल हाइड्रो डेभ्लपर्स, साग्रिंला डेभलमेन्ट बैंकर एनआईसी एशिया बैंकका लगानीकर्ताले ४ प्रतिशतभन्दा बढीले कमाएका छन् । कुमारी बैंकका लगानीकर्ताले पनि करिब ४ प्रतिशतले नै कमाएका छन् ।
यता नेपाल फाइनान्सको लगानीकर्ताले सवार्धिक ५ प्रतिशत माथिले गुमाउँदा धरै गुमाउने शीर्ष ५ कम्पनीमा ४ वटा हाइड्रोपावरका लगानीकर्ता रहेका छन् ।