काठमाडौं । सरकारका नवनियुक्त सूचना तथा सञ्चारमन्त्री मन्त्री पार्वत गुरुङले सरकार जनताको जीवन र स्वास्थ्यप्रति अत्यन्त संवेदनशील रहेको बताएका छन् । कोरोना संक्रमितको उपचारबाट सरकारले हात झिकेको भन्ने विषयमा भ्रममा नपर्न भन्दै स्पष्टिकरण दिएका छन् ।
सोमबार असोज २६ र २९ गते बसेको मन्त्रिपरिषद् बैठकको निर्णय सार्वजनिक गर्दै उनले सरकारले गरेका कामको फेहरिस्त सुनाउँदै जनताको स्वास्थ्यप्रति सरकार संवेदनशील रहेको बताए ।
राज्यले सबै नागरिकको उपचारको प्रबन्ध मिलाएको र सरकारले स्वास्थ्य संरचनाको विस्तार गरेको उनले बताए । कोरोना परीक्षणको दायरा फराकिलो बनाएको छ र सबैलाई उपचारको सुविधा उपलब्ध गराएको उनले दाबी पनि गरे ।
आर्थिक रुपमा विपन्न वर्ग, असहाय, अशक्त, एकल महिला, अपांगता, ज्येष्ठ नागरिकलाई विशेष गरी निशुल्क उपचारको व्यवस्था गरिएको भन्दै उनले सरकारले कसैलाई उपचारबाट वञ्चित नगर्ने नीति लिएको बताए ।
रोगको संक्रमण विस्तार हुँदै गएको अवस्थामा काठमाडौं उपत्यकामा थप दुई हजार एचडीयूको बेड र संक्रमित भएका जिल्लामा थप दुई सय एचडीयू बेड १५ दिनभित्र राख्न स्वास्थ्य मन्त्रालयलाई निर्देशन दिएको पनि बताए ।
उपत्यकामा प्रयोगमा रहेका क्वारेन्टिनलाई आइसोलेसन सेन्टर बनाउने निर्णय गरेको भन्दै उनले सरकारको यी निर्णयले जनताको जीवन र स्वास्थ्यप्रति सरकार अत्यन्त संवेदनशील छ भन्ने कुरा प्रष्ट हुने पनि बताए ।