लन्डन । कोरोना भाइरसको संक्रमण बढेपछि बेलायतमा फेरि प्रतिबन्धहरु कडा पारिने भएका छन् । बीबीसीका अनुसार लन्डनमा दोस्रो चरणको कोरोना भाइरस प्रतिबन्धहरु जारी गरिने भएको हो ।

लन्डनका लाखौं नागरिकहरुले शुक्रबार मध्यराति देखि कडा प्रतिबन्धहरुको सामना गर्नुपर्ने एकजना सांसदले बताएका छन् । 

उनले पहिलो चरणबाट दोस्रो चरणमा प्रवेश गर्न लागिएकोले 'उच्च सतर्कता' अपनाइने बताएका छन् । 

मानिसहरुलाई सामाजिक दूरीका मापदण्डहरु पालना गर्नुपर्ने, आवश्यकबाहेक घरबाहिर ननिस्किनेलगायतका नियमहरु लागु गरिने भएका हुन् । 

यससँगै एक ठाउँमा ६ जनाभन्दा बढी मानिसहरुलाई भेला हुन रोक लगाउने, होटल तथा रेस्टुरेन्ट बन्द गरिनेलगायतका नियमहरु पालना गर्नपर्ने हुन्छ । - बीबीसी