नयाँ दिल्ली । बलिउड अभिनेता सुशान्त सिंह राजपुतको मृत्यु प्रकरणमा ‘गैर जिम्मेवार रिपोर्टिङ’ गरेको दाबी गर्दै केही मिडिया प्रतिष्ठानविरुद्ध दिल्ली हाइ-कोर्टमा मुद्दा दायर भएको छ ।
फिल्म उद्योगको प्रतिनिधित्व गर्ने चार संगठन र ३४ निर्माताहरुले केही मिडिया प्रतिष्ठानविरुद्ध मुद्दा दायर गरेका हुन् ।
रिपब्लिक टिभी, अर्णव गोस्वामी, रिपब्लिक टिभीका प्रदीप भण्डारी, टाइम्स नाउ, राहुल शिवशंकर र नविका कुमारविरुद्ध मुद्दा दायर भएको बीबीसीले जनाएको छ ।
बलिउडसँग आवद्ध व्यक्तिहरुविरुद्ध अपमानजनक र गैर-जिम्मेवार टिका-टिप्पणी रोक्ने प्रयासस्वरुप मिडिया प्रतिष्ठानहरुविरुद्ध मुद्दा दायर गरिएको बताएका छन् ।
उनीहरुले बलिउडसँग जोडिएका व्यक्तिहरुको व्यक्तिगत अधिकारमा हस्तक्षेप गर्ने प्रवृति र मिडिया ट्रायल रोक्न पनि माग गरेका छन् । - बीबीसी