काठमाडौं । नेपाल वायुसेवा निगमका नवनियुक्त महाप्रबन्धक डिम प्रसाद पौडेलले पदभार ग्रहण गरेका छन् । पौडेललाई सरकारले ४ वर्षका लागि निगमको महाप्रबन्धकमा नियुक्त गरेको छ । चाटर्ड एकाउन्टेन्टका साथै व्यवस्थापन विज्ञका रुपमा परिचित पौडेल यसअघि निगम सञ्चालक समितिको सदस्य थिए ।
निगमका कार्यकारी अध्यक्ष सुशील घिमिरेले कोरोना महामारीको अवस्थामा पनि निगमले उल्लेखनीय सेवा प्रदान गर्दै आएको भन्दै पारस्परिक सल्लाह र समझदारीको आधारमा नयाँ महाप्रबन्धकको नियुक्ति भएकोले मिलेर काम गर्ने बताए ।
नवनियुक्त महाप्रबन्धक पौडेलले उडड्यन क्षेत्रमा आफ्नो अनुभव नयाँ भए पनि सरकारले विश्वास गरी नयाँ जिम्मेवारी प्रदान गरेकोमा आभार व्यक्त गरे । उनले निगमलाई गतिशील बनाउन एक्लो प्रयास पर्याप्त नहुने सन्दर्भमा सबैको सहयोगको अपेक्षा गरेको बताए ।
परम्परागत शैलीमा काम गरेर अपेक्षित उपलब्धि हासिल गर्न नसकिने उल्लेख गर्दै फरक ढंगले सिर्जनात्मक काम गर्नुपर्ने आवश्यकता उनले औंल्याए ।