नेपालमा कोभिड—१९ को संक्रमण रोकिने लक्षण देखिएको छैन । सरकारले भने महामारीका अगाडि घुँडा टेकेको देखियो । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमको ‘बेहोस भएमा वा हुन लागेमात्र अस्पताल आउनु’ भन्ने अभिव्यक्तिबाट सरकारको पोल खुलेको हो । नियमित अनलाइन पत्रकार सम्मेलनमा डा. गौतमले बुधवार स्पष्ट नभने पनि काठमाडौंका अस्पतालहरूमा कोभिड—१९ का बिरामीको उपचार गर्ने क्षमता नभएको सन्देश दिएका हुन् । उता बिहीवार सार्वजनिक गरिएको जानकारीअनुसार देशमा २४ घन्टामा ४ हजार ३६४ जना थपिएपछि संक्रमितको कुल संख्या २६ हजार ६८४ पुगेको छ । सक्रिय संक्रमितको संख्या २५ हजार नाघेमा बन्दाबन्दी फेरि गर्नुपर्ने हुनसक्छ भन्ने सन्देश सरकारले यसअघि दिएको थियो । महामारीमा समेत नागरिकको उपचार गर्न असमर्थ भयौँ भन्न लाज नमान्ने शासकहरूबाट जनताले के अपेक्षा गर्ने ? 

दसैंका लागि घर जाने आउनेहरूको आवागमन रोकिने कुनै पनि बन्देज वा निषेध सुरु गर्ने आँट सरकारले पक्कै गर्नेछैन । दसैंका मुखमा आवागमनमा रोक लगाउनु यसै पनि मूर्खता हुन्छ । सरकार जिम्मेवार भएको भए आजको अवस्था आउने नै थिएन । नेपालसँग तयारीका लागि पर्याप्त समय थियो । यस्तै, जनतालाई विश्वासमा लिन सकेको भए संक्रमण नियन्त्रणका लागि अपनाइएका उपायहरू सफल पनि हुनसक्थे । तर, सरकारी अधिकारीहरू विशेषगरी सम्बन्धित मन्त्रीहरू अत्यन्त गैरजिम्मेवार अभिव्यक्ति दिए । त्यसपछि पनि मन्त्री र सरकारी अधिकारीहरूको ध्यान संक्रमण नियन्त्रणमा नगएर महामारीको निहुँमा राज्यको ढुकुटीबाट कसरी धेरै दोहन गर्न सकिन्छ भन्नेमा गयो । देशमा लागू गरिएको करिब ६ महिनाको बन्दाबन्दी र निषेधाज्ञाको निर्णय जनस्वास्थ्यका दृष्टिबाट भएन । बरु, राजनीतिक स्वार्थमा बन्दाबन्दी र निषेधाज्ञा गरिएकाले जनताले पनि अवज्ञा गरे । 

घरमा अभिभावक गैरजिम्मेवार भए सन्तान बढी जिम्मेवार हुनुपर्छ । नेपालका हकमा सरकार गैरजिम्मेवार भएपछि जनताले बढी जिम्मेवारी बोध गर्नुपर्थ्यो । विडम्बना, नेपाली जनता पनि कोभिड—१९ को संक्रमण र यसबाट हुनसक्ने क्षतिका सम्बन्धमा अपेक्षित जिम्मेवार देखिएनन् । राजनीतिक दलका नेताहरू यस सन्दर्भमा सबैभन्दा बढी गैरजिम्मेवार देखिए । पार्टी प्रवेशका नाममा यस अवधिमा सबै पार्टीका नेताले संक्रमणको खेती गरे । तिनले भौतिक दूरीलगायत सबै प्रकारका सुरक्षा उपायको अवज्ञा गरेपछि बाँकी जनताले पनि तिनकै बाटो पछ्याए । सरकारले आफूले बनाएको सुरक्षाका उपाय आफैँले कार्यान्वयन गरेन । उपयुक्त सावधानी अपनाउन जोड दिएको भए कम्तीमा सुरक्षाकर्मीहरू नै यति धेरै संक्रमित पक्कै हुने थिएनन् । यसैले अब संक्रमण गाउँगाउँमा फैलन नदिन जनता स्वयंले सावधान हुनुपर्ने देखिन्छ । बजारमा जस्तै अराजकता यातायातका साधनमा पनि देखिन सक्छ । त्यसैले गन्तव्यमा पुगेपछि आफैँ कम्तीमा दस दिन सावधानीपूर्वक एक्लै (आइसोलेसन)मा बसेर संक्रमणको शृंखला टुटाउन सकिन्छ । सरकारले आत्मसमर्पण गर्दैमा जनताले पनि कोभिड—१९ सँग हार्नुपर्छ भन्ने छैन ।