वाशिङ्टन । अमेरिकी राष्ट्रपतिका लागि डेमोक्रेटिक उमेदवार जो बाइडेनले राष्ट्रपति ट्र्म्प कोरोना संक्रमित भइरहे आगामी डिबेट हुननसक्ने बताएका छन् । 

बाइडेनले मंगलबार भने, "मलाई लाग्छ, यदि उहाँलाई कोरोना संक्रमण भइरहे आगामी डिबेट हुनसक्दैन ।" 

"मलाई लाग्छ, हामीले निकै कडा निर्देशनहरुको पालना गर्नुपर्छ । धेरै मानिसहरु संक्रमित भइरहनु भएको छ । यो निकै गम्भीर समस्या हो," उनले थपे । 

आगामी डिबेट १२ अक्टोबरका लागि फ्लोरिडाको मियामीमा हुने तय गरिएको छ । 

राष्ट्रपति ट्रम्पलाई गत बिहीबार कोरोना संक्रमण पुष्टि भएको थियो । तर, उनलाई कहिलेदेखि संक्रमण थियो भन्‍ने यकिन भन्‍न सकिएको छैन । 

अमेरिकी जनस्वास्थ्य निर्देशिका अनुसार ट्रम्प कम्तिमा १० दिनसम्म आइसोलेसनमा बस्‍नुपर्ने हुन्छ । 

तर, राष्ट्रपति ट्रम्पका चनावी अभियानका सल्लाहकार जिना इलिसले राष्ट्रपति ट्रम्प आगामी दोस्रो टेलिभिजन डिबेटका लागि आशावादी भएको बताएकी छन् । 

उनले भनिन्, "ट्रम्पमा राम्रो सुधारहरु भइरहेको छ । तर, व्हाइट हाउसका चिकित्सकहरुसँगको सल्लाहपछि अन्तिम निर्णय लिइने छ ।" 

इलिसले राष्ट्रपति ट्रम्पले यो 'भाइरसलाई गम्भीरतापूर्वक लिएको' बताएकी छन् । "तर, हामी भाइरसको त्रासमा रहन सक्दैनौं,"उनले भने । 

बाइडेन यसबाट भाग्‍न खोजेको स्पष्ट देखिएकोसमेत उनले आरोप लगाएकी छन् । - बीबीसी