विराटनगर । कांग्रेसको राजनीतिमा विशिष्ट योगदान गरेको मोरङका प्रमुख तीन नेताले आफूहरुबीच कुनै किसिमको मतभेद नरहेको भन्दै कार्यकर्तालाई आश्वस्त पार्ने कोसिस गरेका छन् ।
राष्ट्रिय राजनीतिमै प्रभावशाली मानिएका केन्द्रीय सदस्य महेश आचार्य, मीनेन्द्र रिजाल र शेखर कोइरालाबीच बोलचालसमेत नहुने गरेको दृष्टान्त, व्यक्तिगत गुट अनि समूहको विवादका कारण नेतात्रयले तीनतिर मुख फर्काएको बुझाइ आमकार्यकर्ताको बुझाइ छ ।
लोकतान्त्रिक विमर्शका लागि साझा सवाल : साझा मञ्चद्वारा शुक्रबार आयोजित ‘राष्ट्रिय राजनीतिमा मोरङ हिजो आज र भोलि’ विषयक भर्चुअल अन्तरसंवादमा नेताहरुले पार्टीको आसन्न १४औं महाधिवेशनको सम्मुखमा एक रहेको सन्देश दिन खोजेका छन् । यो संवादको ११औं श्रृंखला हो ।
अन्तरसंवादमा कांग्रेस केन्द्रीय सदस्य रिजालले राष्ट्रिय राजनीतिमा आफूहरुबीच फरक विचार नरहेको दाबी गरे । उनले भने, “हामीहरु एक छौं भन्नेमा दुईमत छैन ।” रिजालले कम्युनिस्ट सरकारले स्थानीय र प्रदेश सरकारको अधिकार कटौतीको दिशामा सक्रिय रहेको भन्दै लोकतान्त्रिक मूल्य मान्यतालाई स्थापित गराउन पनि कांग्रेस महाधिवेशनको चुस्त नेतृत्व चाहिएको बताए ।
राजनीतिक इतिहास हेर्दा विराटनगरका भूमिका र पूरै मोरङको महत्त्व अति नै विशिष्ट किसिमको रहेको बताए । उनले भने, “कोइराला परिवारका पिताजी कृष्णप्रसाद कोइरालाले उन्नयन गरेको ठाउँ सय वर्ष पुगेको छ । हामी यहीं ठाउँका हौं झन्डै तीनैजनामा खासै फरक देख्नुपर्ने कारण छैन ।” उनले आफूहरुबीच कांग्रेसको राजनीतिमा फरक रुपमा हेर्नुपर्ने नभएको भन्दै नेतात्रयबीच विचार मिल्ने गरेको सुनाए ।
“हामी लिबरल डेमोक्रेसी मान्ने मानिस हौं कांग्रेसको विचार समयको आवश्यकता हो । हामीमा भएको केही भिन्नता भएको देखाउनुपर्छ,” रिजालले भने, “मोरङको विविधतालाई तीनैजना नेताले हाँक्न सक्नेछन् । बाँकी नेपाललाई पनि प्रतिनिधित्व गर्न काम गर्छौं ।”
कांग्रेस केन्द्रीय सदस्य महेश आचार्यले मोरङको विराटराजाको दरबारदेखि किचकबधसम्मको स्थानले पौराणिक पहिचान र आधुनिक कालखण्डमा लोकतान्त्रिक संघर्ष अनि चेतनाको विशिष्टता बोकेको बताए । उनले भने, “औद्योगिक नगरी, शिक्षाको क्षेत्रमा युगान्तकारी प्रारम्भ गर्ने थलो हो । जनस्तरबाट पहिलोपटक विद्यालय खोलिएको ठाउँसमेत भएकाले मोरङको विशिष्टता छ ।” आचार्यले कांग्रेसबाट समर्पण र नयाँ कुरा गर्ने चाहना बढेको भन्दै विगतको योगदानले आजसम्म पनि थेगेको बताए ।
उनले भने, “पछाडि फर्किएर प्रेरणा खोज्नुपर्छ । नेतृत्व गरेको दम्भको अभिमान पनि होइन । सेवा र समर्पणको भाव लिनुपर्छ । जनताको भाव बुझेर गौरवलाई कायम गर्न सक्छौं ।” आचार्यले कम्युनिस्ट सरकारको कार्यशैलीका कारण देश आर्थिक रुग्णतामा फसेको, संवैधानिक संकट ल्याउने काम भएको र छिमेकी मुलुकबीचको सम्बन्ध नै अति कमजोर अवस्थामा पुगेको सुनाए ।
केन्द्रीय सदस्य कोइरालाले अहिले मोरङ केही पछाडि परेको भनेर चिन्ता लाग्नु स्वभाविक भएको भन्दै तर त्यो अवस्था नरहेको दाबी गरे । उनले राजनीतिमा नैतिकताको खडेरी पर्न थालेको भन्दै डनवाद र धनवादले राष्ट्रिय राजनीति नै प्रभावित बन्न पुगेको बताए ।
“हाम्रो अस्तित्व हामीहरुले गुमाउने क्रममा छौं । विगतमा वडादेखि नै गाविसमा, नपा र जिल्लामा पनि एमाले, माओवादी र कांग्रेससँगै जाँदा कांग्रेस कमजोर बनेको हो,” कोइरालाले भने, “नेतृत्व तहमा तपाईंहरुलाई लाग्दो होला असमझदारी छ कि भन्ने त्यस्तो छैन । हामीबीच असमझदारी छैन । कांग्रेसमा नैतिकता र संस्कार विस्तारै कम हुँदै गएको छ । नैतिकताका बलमा राजनीति हुन्छ । नैतिकता धरासायी बन्दै गएको यसलाई सुधार गर्नुपर्छ ।” कार्यक्रमको समन्वय प्रदेश १ का सांसद सूयर्माराज राईले गरेका थिए ।
1628253175.jpg)
