काठमाडौं । लामो समयको बन्दाबन्दी र निषेधाज्ञापछि काठमाडौं उपत्यकालगायत देशभर चलेका सार्वजनिक सवारी साधनहरुमा न्युन मात्रामा यात्रुहरु चढ्दा यातायात व्यवसायीहरु मर्कामा पर्न थालेका छन् ।

बुधबार काठमाडौंमा चल्ने विभिन्‍न रुटका बस, मिनि बस, माइक्रोबस र ट्याम्पोहरु प्रायः खाली-खाली चलिरहेका थिए । काठमाडौंमा विगत ६ बर्षदेखि ट्याम्पो चलाउँदै आएकी काभ्रेकी रमिला रानामगर भन्छिन् एक दिन कमाएर दुई दिन खानसम्म पुर्‍याउन धौ-धौ भएको दुखेसो सुनाउछिन् ।

उपत्यकामा जोर-बिजोरका आधार सवारीसाधन चलिरहेको अवस्थामा एक दिन कमाएर दुई दिन खर्च चलाउन पर्दा धेरै यातायात व्यवसायीहरु मर्कामा परेको  व्यवसायीहरुको गुनासो छ । 

यता उपत्यकामा हरेक दिन कोरोनाको बढ्दो संक्रमणले सार्वजनिक यातायातहरुमा यात्रुहरु चढ्नै डराउने गरेको छन् । अतिआवश्यक कामबाहेक सार्वजनिक सवारी साधनमा चढ्नै डर लाग्‍ने गरेको यात्रुहरुले बताएका छन् ।

लामो समय कोरोना महामारीका कारण बन्द भएका यातायातका साधनका धेरै चालक र सहचालकको रोजिरोटी समेत खोसेको बस चालक हरिबहादुर डंगोल बताउछन् । 

अहिले बस सञ्‍चालन गर्दा लाग्‍ने खर्च उठाउनसमेत धौ-धौ परेको उनी बताउँछन् । यस्तै लामो समयसम्म चलिरहने हो भने व्यवसाय नै धरापमा पर्ने डंगोल बताउँछन् ।