काठमाडौं । चिकित्सा शिक्षा सुधारका माग राख्दै १५ दिनदेखि अनसनरत डा. गोविन्द केसीको स्वास्थ्य अवस्था खस्किँदै गएको छ । त्रिवि शिक्षण अस्पतालमा अनसनरत डा. केसीमा जिउ गल्ने, चक्कर लाग्‍ने, धड्कन बढ्नेलगायतका समस्या देखिन थालेको त्रिवि शिक्षण अस्पतालले जानकारी दिएको छ ।

डा. केसीको रगतमा डब्लूबीसीको मात्रा कम भएको, सुगर कम भएको र पोटासियमलगायतका तत्व पनि कम देखिएको डा. केसीको स्वास्थ्य अवस्था निगरानी गरिरहेका अस्पतालका डा. सुवासप्रसाद आचार्यले जारी गरेको मेडिकल बुलेटिनमा भनिएको छ । 

डा. आचार्यको टोलीले अनसनरत डा. केसीको स्वास्थ्य अवस्था जुनसकै बेला पनि थप गम्भीर हुन सक्नेसमेत बताएका छन् । उनलाई जुनसुकै बेला आईसीयूमा सार्नुपर्ने अवस्था रहेकोसमेत अस्पतालले बताएको छ ।

फाइल तस्बिर ।