काठमाडौं । चालु आर्थिक वर्षको पहिलो महिनामा नै रेमिट्यान्स बढेको छ । कोभिड १९ ले गर्दा विश्वभर नै अर्थतन्त्र प्रभावित हुँदा पनि नेपालमा भित्रिने रेमिट्यान् भने बढेको हो । 

नेपाल राष्ट्र बैंकले चालु आर्थिक वर्षको पहिलो महिना (साउन) को देशको आर्थिक तथा वित्तीय स्थितिको प्रतिवेदन सार्वजनिक गर्दै साउन महिनामा ९२ अर्ब ७१ करोड रेमिट्यान्स भित्रिएको जनाएको छ । जुन गत आर्थिक वर्षको सोही अवधिभन्दा २३ प्रतिशतले बढी हो । 

गत आर्थिक वर्षको पहिलो महिनामा ७५ अर्ब ४० करोड रेमिट्यान्स भित्रिएको थियो । नेपाली मुद्रामा मात्रै नभएर अमेरिकी डलरमा पनि रेमिट्यान्स १४.५ प्रतिशतले बढेको राष्ट्र बैंकले जनाएको छ । 

कोरोनाका कारण अवैधानिक संयन्त्र (हुन्डी) मार्फत आउने रेमिट्यान्स घटेका कारण वैधानिक संयन्त्र (बैंकिङ प्रणाली) मार्फत आउने रेमिट्यान्स बढेको राष्ट्र बैंक  स्रोतको बुझाइ छ । 

वैदेशिक रोजगारीमा जानेको संख्या शतप्रतिशत घट्यो 

यस अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या भने करिब शतप्रतिशतले नै घटेको छ । 

विश्वभर कोभिड १९ को प्रभाव बढ्दै जाँदा सरकारले जारी वैदेशिक रोजगारीमा जानेलाई श्रम स्वीकृति दिने प्रक्रिया रोक्दा अन्तिम श्रम स्वीकृति लिएर वैदेशिक रोजगारीमा जानेको संख्या ९९.२ प्रतिशतले घटेको छ । अघिल्लो वर्षको सोही अवधिमा भने यस्तो संख्या १९.० प्रतिशतले घटेको थियो । 

यस अवधिमा अन्तिम श्रम स्वीकृति लिएर जाने मात्रै नभएर पुनः श्रम स्वीकृति लिने नेपालीको संख्या पनि ८०.० प्रतिशतले घटेको राष्ट्र बैंकले जनाएको छ । अघिल्लो वर्षको सोही अवधिमा 
यस्तो संख्या १.३ प्रतिशतले घटेको थियो ।

चालु आर्थिक वर्षको पहिलो महिनामा रेमिट्यान्स सँगै खुद ट्रान्सफर आय पनि २०.० प्रतिशतले वृद्धि भएको छ ।  यस अवधिमा खुद ट्रान्सफर आय १ खर्ब १ अर्ब ८७ करोड पुगेको केन्द्रीय बैंकले जनाएको छ । गत आर्थिक वषको सोही अवधिमा यस्तो आय ८४ अर्ब ९३ करोड रहेको थियो ।