राष्ट्रियसभामा राष्ट्रपति विद्यादेवी भण्डारीले मनोनीत गर्ने सिटमा नेकपाका नेता वामदेव गौतमजीलाई ल्याइएको छ ।
प्रतिनिधिसभा निर्वाचनमा पराजय बेहोर्नुभएका उहाँलाई राष्ट्रपतिले मनोनीत गरेर ल्याउनुभएकोमा विरोध भइरहेको छ । राष्ट्रियसभामा तीन जनाबाहेक अरु त निर्वाचित नै भएर आउने हो । निर्वाचित भएर आउने पदमा एक ठाउँमा चुनाव हारेको मान्छे निर्वाचनमा आउन पाउँदैन भन्ने कुरा त भएन । त्यसरी आउने कुरालाई स्वभाविक रुपमै लिन्छु मैले । पार्टीले आवश्यक ठान्यो भने त्यहाँ उमेदवार बनाएर चुनावबाट जिताएर ल्याउन पाइयो । यसमा कुनै बाधा छैन ।
जहाँसम्म राष्ट्रपतिबाट मनोनीत हुने तीनजनाको कुरा छ । त्यहाँ मनोनीतको कुरामा संविधानले केही नबोलेको हुनाले त्यसमा पनि कानुनतः चुनाव हारेकालाई ल्याउन मिल्दैन भन्ने लाग्दैन । तर, राष्ट्रपतिले मनोनीत गर्ने पद भनेकोचाहिँ राष्ट्रका लागि योगदान गरेका व्यक्तिहरूलाई राष्ट्रियसभामा ल्याउनका लागि ठाउँ बनाइएको हो । पहिलोपटक मनोनीत गर्दा विभिन्न क्षेत्रमा योगदान गरेका त्यस्तै व्यक्तिहरूलाई ल्याइएको पनि हो । तीनजना आ-आफ्नो क्षेत्रका विज्ञहरूनै आउनुभएको थियो । तर, अहिले उनीहरू (नेकपा) को राजनीतिक अभिष्टका लागि वामदेव ल्याएको हुनाले विवाद भएको हो । तर, कानुनले रोक्छजस्तो लाग्दैन ।
यसरी राष्ट्रपतिबाट मनोनीत गर्ने तीन पदमा राजनीतिक व्यक्तिलाई नै ल्याउँदा गलत नजिर बस्छ । विज्ञहरू, आफ्नो क्षेत्रमा ख्याति कमाएका र राष्ट्रमा योगदान गरेका मानिसहरू नआएर भोलि पुरानो नजिर देखाएर राजनीतिक नियुक्तिका रुपमा प्रयोग गर्ने सम्भावना बढ्यो ।
एक ठाउँमा चुनाव हारेर अर्को ठाउँमा चुनावमै जान पाइँदैन भन्ने मलाई लाग्दैन । प्रतिनिधिसभामा हार्यो अब राष्ट्रियसभामा आउनुपर्यो भने पार्टीले आफ्नो तागतमा ल्याउने कुरा हो । ल्याउनसक्छ भने जो आए पनि राजनीतिक मानिस नै आउने भएकाले ५६ सिटमा त म केही पनि भन्दिनँ । नारायकाजी श्रेष्ठजी आएकामा मलाई केही भन्नु छैन । तर, त्यो तीन सिटमा जसरी वामदेव गौतमजीलाई ल्याइयो, नल्याइएको भए हुन्थ्यो भन्ने मलाई लाग्छ ।
वामदेवजीलाई ल्याइएकामा पनि आपत्ति जनाउनुपर्ने थिएन । तर, उहाँ जुन ठाउँबाट आउनुभयो, त्यो उहाँका लागि होइन । संविधान बनाउँदा विभिन्न व्यावसायिक क्षेत्रमा, अन्य कुनै विधामा योगदान गरेका व्यक्तिलाई ल्याउनका लागि राखिएको ठाउँबाट उहाँ आउनुभयो भन्नेमा प्रश्न हो ।
राजनीति क्षेत्रबाटै ल्याउने हो भने राष्ट्रपतिबाट त्यो तीन सिटमा ल्याउनुपर्ने के जरुरी थियो र ? त्यो ३ सिट पनि चुनाबाटै ल्याए भइहाल्थ्यो नि । योगदान वामदेव जीको छैन भन्ने होइन । तर, राष्ट्रपतिबाट मनोनीत हुने सिट राजनीतिक योगदानका लागि रोकेको होइन । राजनीतिक योगदान भएका मानिसका लागि ५६ सिट दिएको हो । समानुपातिक सिट छ ।
(राष्ट्रियसभामा प्रमुख प्रतिपक्ष दलका नेता तथा वरिष्ठ अधिवक्ता अधिकारीसँग जगन्नाथ दुलालले गरेको कुराकानीमा आधारित)