काठमाडौं । विभिन्न १३ विद्यार्थी संगठनले लामो तथा छोटो दुरीका सवारी साधन सञ्चालनमा ५० प्रतिशत भाडा सातदिनभित्र फिर्ता गर्न अल्टिमेटम दिएको छ ।
भौतिक पूर्वाधार तथा यातायातमन्त्रीलाई बुझाइएको ज्ञापनपत्रमा भनिएको छ, “हवाईजहाजमा पूर्ण क्षमतामा यात्रुहरु राख्न दिइएको तथा सार्वजनिक बसहरुमा आधामात्रै यात्रु चढाउने निर्णय अपरिपक्व, अव्यवहारिक र अवैज्ञानिक छ । हवाइजहाजबाट यात्रा गर्दा कोरोना नसर्ने र बसबाट यात्रा गर्दा सर्ने भन्ने हुन सक्दैन । सार्वजनिक यातायातमा आधा संख्यामा यात्रु राख्ने निर्देशन दिइए पनि पूर्ण क्षमतामा यात्रुहरु राख्ने तर दोब्बर भाडा असुल्ने काम भएको छ । त्यसैले निर्णय अवज्ञा गर्ने र यात्रुहरुमाथि लुट मच्चाउने गरिएको छ । सम्पूर्ण सार्वजनिक यातायातमा स्वास्थ्यका उपयाहरु अपनाइ साविककै भाडा लिइ सञ्चालन गर्न र यात्रुहरुको आवतजावत सहज बनाउन माग गर्दछौं ।”
तर मन्त्री वसन्तकुमार नेम्वाङले भने पूर्ण क्षमतामा अहिले यातायात सञ्चालन गर्न दिन नसकिने बताएका छन् ।
कोभिड १९ सम्बन्धमा स्वास्थ्यको तोकिएको मापदण्डलाई पहिलो सर्त मानेर सार्वजनिक यातायात सञ्चालन गर्न दिइएकाले तत्काल भाडादर घटाउन र सार्वजनिक यातायातलाई पूर्ण क्षमतामा सञ्चालन गर्न दिन नसकिने उनले स्पष्ट पारेका हुन् ।
यस्तो छ ज्ञापनपत्र