विदेश
काठमाडौं । अमेरिकी राष्ट्रपति उमेदवार डोनाल्ड ट्रम्पले अर्का उमेदवार हिलारी क्लिन्टनलाई बन्दुक समर्थकहरूले चाहेमा तह लगाउन सक्ने टिप्पणी गरेर नयाँ विवाद निम्त्याएका छन् । मंगलबार एउटा चुनावी सभामा बोल्दै ट्रम्पले क्लिन्टनले उदार न्यायाधीशहरू नियुक्त गर्ने मौका पाइन् भने हतियारधारण गर्ने स्वतन्त्रताका पक्षधरहरूले केही गर्न नसक्ने भन्दै क्लिन्टनलाई रोक्न भनेको रोयटरले जनाएको छ ।
क्लिन्टनको निर्वाचन अभियानका तर्फबाट अमेरिकाको राष्ट्रपति हुन चाहने व्यक्तिले हिंसालाई दुरूच्साहित गर्न नहुने भन्ने ट्रम्पको भनाइलाई 'खतरनाक' भनेर प्रतिक्रिया व्यक्त गरिएको छ ।
ट्रम्पको निर्वाचन अभियानका तर्फबाट दिइएको स्पष्टीकरणमा उनले दोस्रो संशोधनका पक्षधरहरूलाई एकत्रित हुन र क्लिन्टनविरुद्ध लाग्न आह्वान गरेको बताइएको छ । अमेरिकाको संविधानमा भएको दोस्रो संशोधनले हतियार लिएर हिँडडुल गर्न पाउने स्वतन्त्रता सुनिश्चित गरेको छ ।
अमेरिकी सिनेटर एलिजावेथ वारेनले ट्रम्पलाई 'बिचरा कायर' भन्दै एक जना महिलाले हराउन लागेको सहन नसकेर ज्यान लिने धम्की दिएको भनेकी पनि रोयटरले जनाएको छ ।
नर्थ क्यारोलिनाको एउटा चुनावी सभामा न्यु योर्क पूर्व मेयर रूडी गुलियानीले भने ट्रम्पको भनाइ सन्दर्भबाहिर तोडमरोड गरेर सञ्चार माध्यमले क्लिन्टनको हतियारका रूपमा काम गरेको आरोप लगाएका छन् ।
अमेरिकाको गुप्तचर संस्थाले यस्ता विषयमा सामान्यतः प्रतिक्रिया नजनाउने भए पनि ट्रम्पको यस भनाइप्रति 'ध्यानाकर्षण भएको' प्रतिक्रिया दिएको छ । गुप्तचर संस्था सीआईएमा पूर्व निर्देशक मायकल हेडेनले सीएनएनलाई लेखेको पत्रमा आफूले के भनियो त्यसमा मात्र हैन अरूले के सुन्छन् त्यसप्रति पनि जिम्मेवार हुनुपर्छ । उनी ट्रम्पको भनाइको विरोध गर्ने रिपब्लिकन पार्टी समर्थक ५० जना सुरक्षाविद्मध्येका एक भएको रोयटरले जनाएको छ ।
यसैबीच रोयटरको अर्को समाचारमा क्लिन्टन मंगलबार ट्रम्पभन्दा ७ प्रतिशतले अगाडि रहेको जनाइएको छ ।
प्रकाशित मिति: बुधबार, साउन २६, २०७३ ०६:११
प्रतिक्रिया दिनुहोस्