उमेदवारी दर्ताका क्रममा उर्लेर प्रकट भएको जनसहभागिता हेर्दा चुनाव बहिष्कारको रणनीति राष्ट्रिय जनता पार्टीका नेताका लागि प्रत्युत्पादक सिद्ध हुने देखियो । दोस्रो चरणमा प्रदेश नम्बर १, ५ र ७ का ३५ जिल्लाका ३३४ वटा स्थानीय तहमा निर्वाचन हुँदैछ । पहिलो चरणमा प्रदेश नम्बर ३, ४ र ६ मा स्थानीय तहको निर्वाचन सम्पन्न भइसकेको छ । असार १४ गते मतदान हुनेगरी प्रकाशित निर्वाचन कार्यक्रमअनुसार आइतवार मनोनयन दर्ता भएको छ । यस निर्वाचनबाट एक महानगरपालिका, सात उपहानगरपालिका, १ सय ११ नगरपालिका र २ सय १५ वटा गाउँपालिकामा १५ हजार ३८ जनप्रतिनिधि चुनिनेछन् । नेपालको संविधान, २०७२ ले स्थानीय तहलाई संवैधानिक हैसियत प्रदान गरेको छ । प्रदेश नम्बर २ मा स्थानीय तहको निर्वाचन असोजमा गर्नेगरी स्थगित गरिएको छ । केही अप्रिय घटनाबाहेक सबै ठाउँमा उत्साहपूर्वक उमेदवारी दर्ता हुनुले जनता निर्वाचनका पक्षमा छन् भन्ने पनि स्पष्ट भएको छ । सार्वजनिक स्थानमा बम विस्फोट गराउने कायरतापूर्ण कार्यको त राजपाले पनि निन्दा नै गर्छ होला ।

राष्ट्रिय जनता पार्टीका नेताहरू भने जनताको स्वःफूर्त सहभागिता र उत्साहलाई ‘नाटक‘भन्दै निर्वाचन बिथोल्ने अभियानमा लागेका छन् । कार्यकर्तालाई अनुचित रूपमा उक्साएर मुठभेडको अवस्था उत्पन्न गराउने उनीहरूको रणनीति देखिन्छ । उमेदवारी दर्ताका दिन बन्द आह्वान गरेर राजपाले जनतालाई तर्साउने प्रयास गरेको छ । तैपनि, जनताले बन्दबाट भएको कष्टको बेवास्ता गरी मनोनयन प्रक्रियामा सहभागी भएर राजपाको नीति गलत भएको सन्देश दिइसकेका छन् । कतिपय ठाउँमा त राजपाकै स्थानीय नेताहरू स्वतन्त्र उमेदवारका रूपमा चुनावमा सहभागी भएका छन् । यसबाट पनि चुनाव बहिष्कार गर्दा राजपाको जनाधार खस्कने स्पष्ट देखिन्छ । अर्कातिर, निर्वाचन बहिष्कार र बन्दका कार्यक्रमले राजपाका कार्यकर्तालाई अरू दलका सहकर्मीसँग प्रत्यक्ष मुठभेडको खतरा बढाएको छ । प्रदेश नम्बर २ बाहेक अरू प्रदेशका राजपाका कार्यकर्ताका लागि स्थानीय निर्वाचनमा सहभागी हुने मौका अब ५ वर्षपछि मात्र आउनेछ । त्यतिमात्र हैन प्रदेश नम्बर २ का जनताले राष्ट्रिय जनता पार्टीका नेताको हठले गर्दा स्थानीय तहमा प्रतिनिधि चुन्ने मौका करिब ३ महिनापछि मात्र पाउनेछन् । निर्वाचनमा उत्रेर नेतृत्व विकास गर्नबाट वञ्चित राजपाका कार्यकर्ता पक्कै पनि गलत पार्टी र नेताको पछि लागेकोमा पछुतो गर्दै होलान् । उनीहरूका हकमा हिन्दीको एउटा कहावत ‘अब पछताए होत क्या जब चिडियाँ चुग गई खेत’ चरितार्थ भएको छ ।

पहिलो चरणबाटै निर्वाचनमा सहभागी भएको भए राजपाले देशभर संगठन गर्ने र उपस्थिति देखाउने मौका पाउने थियो । यसपटक मात्रै पनि सहभागी भएको भए प्रदेश नम्बर १, ५ र ७ जस्ता तराई जिल्लामा उनीहरूले आफ्नो प्रभाव विस्तार गर्न पाउने थिए । संविधान संशोधनका पक्षमा जनमत बनाउन निर्वाचनभन्दा राम्रो अवसर र विधि अर्को हुनै सक्तैन । अझै पनि बेला छ । राजपाका नेताले बहिष्कार अभियानलाई अहिंसात्मक शैलीमा अगाडि बढाए जनतासम्म सन्देश पुग्नसक्छ । कम्तीमा बन्द हड्तालजस्ता अवाञ्छित क्रियापलाप गरेर जनतालाई नसताउने र तोडफोड, आक्रमण र विध्वंश मच्चाएर क्षति नपुर्‍याउने हो भने जनता तिनका कुरा सुन्न तयार हुनसक्छन् । यद्यपि, उमेदवारी दर्ताका क्रममा देखिएको उत्साहबाट भने चुनावविरुद्ध जनताले कसैका कुरा नसुन्ने स्पष्ट भएको छ । यसैले राजपाका नेताहरूले ‘खिसियानी बिल्ली खम्बा नोचे’ भनेझैँ आफ्नो गलत रणनीतिको परिणामको रिस जनतासँग फेर्ने आत्मघाती मूर्खता नगरुन् । निर्वाचन प्रचारप्रसारलगायतका क्रियाकलापमा जनतालाई सहभागी हुन अप्ठेरो पार्ने आन्दोलन जनता जनार्दनलाई हेप्नु हो । जनतालाई हेप्ने दुस्साहस महँगो पर्छ ! लोकतन्त्रप्रति जनताको मोहको सम्मान सरकारले पनि गर्न सक्नुपर्छ । राजपाका नेतालाई मनाउने नाममा अनावश्यक र अनुचित मोलतोल नगरेको भए पहिलो चरणमै देशभर निर्वाचन सम्पन्न भइसक्ने रहेछ । यसैले अब जनताको अधिकार कुण्ठित गरेर राजनीतिक स्वार्थ सिद्ध गर्नेहरूको जालमा सरकार फस्नु हुँदैन । त्यसो गर्नु जनतालाई हेप्नुजस्तै हो ।