दण्डहीनताको अन्त्य नहुँदासम्म समाजमा न्यायको किनबेचलाई सामान्य मान्ने प्रवृत्ति रहिरहन्छ । सप्तरीको डाकनेश्वरी नगरपालिका– ७ ललितपुरकी किशोरीलाई आत्महत्या गर्न बाध्य बनाउने यही प्रवृत्ति हो । अगिल्लो दिन सामूहिक बलात्कारमा परेकी किशोरीलाई प्रहरीमा उजुर गर्न नदिई बलपूर्वक ‘मिलापत्र’ गराएपछि उनले मंगलवार आत्महत्या गरेकी हुन् । बलात्कारको उजुरी दिन प्रहरी कार्यालयमा जान लाग्दा उनी र उनको परिवारलाई केही गाउँलेले रोकेका थिए । प्रहरीमा उजुरी गरे उनलाई हटक गर्ने धम्की गाउँले दिएको बताइएको छ । सम्भवतः यही अपमानका कारण बलात्कृत युवतीले आत्महत्या गरेकी हुन् । किशोरीको आत्महत्यापछि प्रहरीले बलात्कारको अपराध लुकाउने मतियारमध्ये केहीलाई पक्राउ गरेको छ । तर, जातका आधारमा बढी नै विभाजित र अपेक्षाकृत अनुदार परम्परावादी समाज भएकाले अझै पनि न्याय हुनेमा ढुक्क हुनसक्ने देखिँदैन । 

नेपालका गाउँहरूमा सबैतिर यस्तो प्रकृतिको घटना नौलो त हैन तर प्रदेश नम्बर २ र कर्णाली तथा सुदूरपश्चिम प्रदेशमा अलि बढी नै हुनेगरेको पाइन्छ । यी तीनवटै प्रदेशमा केही समानता पनि छन् । गरिबी यी क्षेत्रमा बढी छ । अरू आर्थिक, सामाजिक सूचकमा पनि यी तीनवटा प्रदेशमा सरदरभन्दा कमजोर छन् । अर्को समानता यी तीनवटै प्रदेशमा अपवादबाहेक राजनीतिलाई मूलतः ठालुहरूले कब्जा गरेका छन् । जातिगत भेदभाव पनि नेपालका अरू भेगमा भन्दा यी तीनैवटा प्रदेशमा बढी व्याप्त छ । यिनै तीनवटा प्रदेशमा अन्यत्रभन्दा राजनीतिका नाममा हिंसात्मक समूहको प्रभाव बढी देखिएको थियो । आश्चर्यजनक संयोग के छ भने यी तीनवटा प्रदेशमै स्थानीय तह र प्रदेश सरकार भ्रष्टाचारमा पनि बढी संलग्न भएको देखिएको छ । 

एक्काइसौं शताब्दीमा पनि मध्ययुगीन बर्बरता सम्झाउने यस्ता घटना भइरहनु राज्यकै लागि चुनौतीपूर्ण कलंक हो । वास्तवमा यस्तो घटना स्थानीय नेतृत्वको नैतिक संकट पनि हो । प्रभावशाली नेता वा स्थानीय पदाधिकारीको संरक्षण नपाउने हो भने बलात्कारजस्तो अपराध मिलापत्रका नाममा लुकाउने आँट सामान्य गाउँलेले गर्ने थिएनन् । रुकुममा नवराज विक र उनका साथीहरूको जघन्य हत्यालाई भवितव्य देखाउन त्यहाँका सांसदले संसद्मा गरेको असफल प्रयास अपराध र राजनीतिको निकट सम्बन्धको उदाहरण हो । अतः सप्तरी प्रहरीलाई अहिले पक्राउ परेका व्यक्तिविरुद्ध मुद्दा नचलाउन राजनीतिक दबाब परे आश्चर्य मान्नु पर्दैन । तर, घटनामा संलग्न बलात्कारका अभियुक्तका साथै अपराध लुकाउन दबाब दिने मतियारहरूमाथि कानुनबमोजिम सजाय दिलाउन सप्तरीका सम्बन्धित सरकारी अधिकारीले दृढता देखाउनुपर्छ । यस घटनामा पनि पितृसत्तात्मक समाजमाथि दोष थोपरेर अपराधका अरू पक्षलाई गौण बनाउने प्रयत्न हुनसक्छ । समाजको पितृसत्तात्मक मानसिकता बलात्कारका लागि पक्कै दोषी छ । तर दण्डहीनताको राजनीतिक संरक्षणका कारण यस्तो अपराध बढेको हो भन्ने बिर्सनु हुँदैन ।