सामूहिक बलात्कारको घटना २५ हजारमा मिलापत्र, युवतीद्वारा आत्महत्या

मिलापत्र गराउने तीनजना पक्राउ, अभियुक्तको खोजी हुँदै

सामूहिक बलात्कारको घटना २५ हजारमा मिलापत्र, युवतीद्वारा आत्महत्या

काठमाडौं । सप्तरीको डाक्नेश्वरी नगरपालिका ७, ब्रह्‍मापुरका १८ वर्षीया युवतीमाथि भएको सामूहिक बलात्कारको घटना २५ हजार रुपैयाँमा मिलाउन खोजेपछि युवतीले आत्महत्या गरेकी छन् । 

भदौ २९ गते बिहान ९ बजेतिर खेतमा घाँस काट्न गएको बेला गाउँका दुई युवाले मण्डल थरकी युवतीमाथि सामूहिक बलात्कार गरेका थिए । बलात्कारजस्तो जघन्य अपराधमा कानुनी उपचार खोज्‍नुको साटो गाउँका अगुवाहरुले २५ हजार रुपैयाँमा कुरा मिलाएका थिए । प्रदेश २ का प्रहरी प्रमुख डीआईजी धीरजप्रताप सिंहले भने, “सुरुमा यो घटना प्रहरीमा आएन । गाउँमा २५ हजारमा मिलाइएको रहेछ । तर २९ गते राति बलात्कृत युवतीले घरभित्र झुन्डिएर आत्महत्या गरिन् । प्रहरी कारण खोतल्दा बलात्कार भएको पाइयो ।”

घटना सार्वजनिक भएपछि सत्रुघन मण्डलको घरमा बसेर पीडक र पीडित पक्षलाई राखेर छलफल २५-२५ हजार रुपैयाँ पीडकले पीडित पक्षलाई दिने सहमति भएको थियो । प्रहरीका अनुसार पीडित युवती भने मिलापत्रका लागि सहमत भएकी थिइनन् । उनको इच्छाविपरीत मिलापत्र भएपछि उनले आत्महत्याको बाटो रोजेको खुलेको छ ।

डीआईजी सिंहका अनुसार पीडितलाई त्रास देखाएर मिलापत्र गराउने कार्यमा संग्लन जयकान्त मण्डल, वासुदेव मण्डल र सत्यनारायण मण्डल पक्राउ परेका छन् । बलात्कारमा संग्लन दुईजनाको खोजी जारी छ । पक्राउ परेकाहरुलाई बलात्कार मतियार र आत्महत्या दुरुत्साहन मुद्दा चलाइने डीआईजी सिंहले बताए । -प्रतिकात्मक तस्बिर

प्रतिकृया दिनुहोस
ad