एजेन्सी । आवश्यक सावधानी नअपनाए जनवरी १ सम्ममा अमेरिकामा कोरोनाका कारण मृत्यु हुनेको सङ्ख्या अहिलेको भन्दा दुई गुणाले बढेर ४ लाख पार गर्ने शुक्रबार वरिष्ठ स्वास्थ्य विद्हरुले बताएका छन् । कोभिड–१९ सम्बन्धी तयार पारिएको नयाँ मोडलका अनुसार अबको चार महिनामा अमेरिकामा थप २ लाख २४ हजार मानिसले ज्यान गुमाउन सक्छन् । 

तर आवश्यक सावधानी, जस्तै मास्कको प्रयोग अनिवार्य गर्ने हो भने चाहिँ सो क्षतिलाई आधा कम गर्न सकिने युनिभर्सिटी अफ वासिङटन इन्सटिटिउटको हेल्थ मेट्रिक्स र मूल्यांकन विभागले पेश गरेको मोडलमा उल्लेख गरिएको छ । तर यसको विपरित सबै कडाइ हटाएमा भने संक्रमण दर र मृतकको सङ्ख्या दुवै अनुमान गरे भन्दा उल्लेखनीय रुपमा वृद्धि हुने चेतावनी पनि दिइएको छ । 

कोभिड विरुद्ध सरकारले कुनै रणनीति नअपनाए जनवरी १ सम्म मृत्युको सङ्ख्या ६ लाख २० हजार पुग्ने यसअघि आइएसएमइको रिपोर्टमा पनि जनाइएको थियो । रिपोर्टका अनुसार अहिले मास्क प्रयोग गर्न अस्वीकार गरेका क्षेत्रमा संक्रमण दर उच्च बिन्दुमा पुगेको छ । यसैकारण डिसेम्बरसम्म पनि यस्तै भइरहने हो भने दैनिक ३ हजारसम्मको मृत्यु हुन सक्ने आइएचएमइले जनाएको छ । 

पछिल्लो समय अमेरिकामा देखा परिरहेका नयाँ संक्रमितहरु १८ देखि २४ को उमेरका रहेका छन् जुन स्कुल कलेज खुलाइएपछि अझ बढ्दै जानेमा विज्ञहरुले चिन्ता व्यक्त गरिरहेका छन् । जस्तै अगस्ट महिनामा मिसोउरीमा मात्र सो उमेर समुहका ७ हजार भन्दा बढी कोरोना पोजेटिभ भएको पाइएको हो । यसमा स्वस्थ युवाहरुमा कोभिडको लक्षण सामान्य मात्र हुने र छिटै ठीक हुने गरेपनि उनीहरुले थाहा नपाइ भाइरसलाई जेष्ठ नागरिक वा संवेदनशील स्वास्थ्य अवस्था भएको व्यक्तिसम्म पुर्याउन सक्छन् । यसकारण पनि युवाहरुले सावधानी अपनाउन र जिम्मेवार रहन महत्वपूर्ण छ नत्र यसको परिणाम भयानक हुने स्वास्थ्यविद्हरुले चेतावनी दिँदै आएका छन् । सिएनएन