गजल – १
    
सधैँ जिन्दगीमा रमाएर हेरौँ
मुलुकमै पसिना बगाएर हेरौँ ।

के पिँजडाको पन्छी सुखी हुन्छ कहिले
चरा नै हावामा उडाएर हेरौँ ।
 
यहाँ जिन्दगीको कहाँ मूल्य छ र ?
स्वयम् आफ्नो आदर जगाएर हेरौँ ।

बहुत दूर जानु छ, सुनसान बाटो 
विजयको पताका उठाएर हेरौँ ।

सफल हुन्न कहिले कि रोएर जीवन
सबैमा नै हाँसो फिँजाएर हेरौँ ।

० ० ०

गजल – २
यस धरामा जिन्दगीको सार खोज्दै छु
आम जनताको यहाँ अधिकार खोज्दै छु । 

छट्पटी यस जिन्दगीमा रोज बढ्दै छ 
भोलि झन् यस देशको अनुहार खोज्दै छु । 

लौ न किन शमशानबाट पीरको क्रन्दन
जिन्दगीमा पीरको उपचार खोज्दै छु ।

तनमा दुक्ख त छँदैछ, मन बनोस् निर्मल
जिन्दगीमा प्रेमको संसार खोज्दै छु ।

ब्रह्मज्ञानीले बनायो प्रेमको मन्दिर
प्रेमको गंगा बगोस्, अवतार खोज्दै छु ।