बैंकक । फेसबुकले थाइल्यान्डको राजसंस्थाको आलोचना गर्ने समूहलाई प्रतिबन्ध लगाएको छ । थाइ सरकारले फेसबुकलाई कानुनी कारबाही गर्ने चेतावनी दिइएपछि फेसबुकले उक्त समूहलाई प्रतिबन्ध लगाएको हो ।
फेसबुकले बैंककले प्रतिबन्ध गर्न दबाब दिँदै कानुनी उपचार खोज्ने बताएपछि प्रतिबन्ध गरेको बीबीसीलाई बताएको छ । थाइल्यान्डमा अहिले सरकारविरुद्ध प्रदर्शनहरू भइरहेका छन् । प्रदर्शकारीहरुले राजसंस्था सुधार हुनुपर्ने माग गरिरहेका छन् ।
थाइल्यान्डको कानुन अनुसार राजसंस्थाको आलोचना गर्न पाइँदैन ।
विदेशबाट खोलिएको 'रोयलिस्ट मार्केटप्लेस' नामक समूहलाई सोमबार साँझदेखि प्रतिबन्ध लगाइएको छ ।
उक्त समूहमा १० लाखभन्दा बढी सदस्य छन् । उक्त फेसबुक ग्रुप सञ्चालन गर्ने 'पाफिन चाचाभाल्पोन्पन'का अनुसार त्यसमा राजसंस्थाबारे गम्भीर छलफल गर्न पाइन्छ र र थाइ नागरिकहरूलाई आफ्नो धारणा स्वतन्त्रतापूर्वक राख्न दिइन्छ ।
उनका अनुसार उक्त समूहमा राजसंस्थाले गर्ने राजनीतिक हस्तक्षेपदेखि उसको सेनासँगको घनिष्ठ सम्बन्ध र राजाको शक्तिका बारेमा बहस हुने गरेको थियो ।
पाफिन स्वैच्छिक निर्वासनमा जापानमा भएका थाई प्राज्ञ हुन् ।
उक्त फेसबुक ग्रुपमा प्रतिबन्ध लगाएपछि नयाँ ग्रुप सिर्जना गरिएको छ । सोमबार साँझ नै सिर्जना गरिएको नयाँ फेसबुक ग्रूपलाई चार लाखभन्दा बढी प्रयोगकर्ताले फलो गरिसकेका छन् ।
फेसबुकले थाई सरकारले "अवैधानिक मानेको सामग्रीलाई सीमित पार्न" आफूलाई बाध्य पारिएको बीबीसीसँग बताएका छन् ।
"यस्ता आग्रहहरू गम्भीर हुन्छन् र मानवअधिकारका अन्तर्राष्ट्रिय कानुनविपरीत हुन्छन् । अनि तिनले नागरिकको अभिव्यक्ति गर्ने क्षमतामा प्रतिकूल प्रभाव पार्छन्," विज्ञप्तिमा भनिएको छ ।
मानवाधिकारवादी समूहहरूले थाइल्यान्डले फेसबुकलाई दिएको दबावको चर्को आलोचना गरेका छन् । 'ह्यूमन राइट्स वाच'ले थाइल्यान्डको सरकारले "फेरि आफ्ना अस्पष्ट र अधिकार संकुचित पार्ने कानुनहरूको दुरुपयोग गरेर" फेसबुकलाई स्वतन्त्र अभिव्यक्तिको अधिकारअनुसार प्रकाशित सामग्रीमा बन्देज लगाउन दबाव दिएको बताएको छ ।
थाइल्यान्डमा राजसंस्था वा राजपरिवारका सदस्यको आलोचना वा अपमान गरे १५ वर्षसम्मको जेल सजाय हुने कानुनी प्रावधान छ ।
थाइ नागरिकलाई युवावस्थादेखि नै राजतन्त्रको सम्मान गर्न सिकाइन्छ । तर पछिल्ला साताहरुमा केही अभियानकर्मीहरुले सार्वजनिक रूपमा राजतन्त्रमा सुधारको लागि आह्वान गरेका छन् । यससँगै सरकार विरोधी व्यापक प्रदर्शनहरुसमेत भएका छन् ।
"मलाई लाग्छ कि यस समूहले राजतन्त्रको छलफललाई उच्च तहमा पुर्याएका छन् र अझै जारी रहेन छ," उनले बीबीसीलाई भने, "सरकारले कानुनी उपचारका नाममा मुख्य नेताहरूलाई पक्राउ गर्न र मेरो समूहमा पहुँच रोक्नका लागि उनीहरूले प्रतिबन्ध लगाएका छन् । यदि यो समूहका युवाहरु रहिरहे भने कठोर कदम चाल्न सकिन्छ।"
थाइ प्रहरीले गत साता प्रदर्शनमा सहभागी नौजनालाई नियन्त्रणमासमेत लिएको थियो । - बीबीसी
1628253175.jpg)
