मिन्स्क । बेलारुसमा भइरहेको राष्ट्रपति एलेक्जेन्डर लुकासेन्कोविरुद्धको आन्दोलनमा सरकारी टेलिभिजनकर्मी नै सहभागी भएका छन् । अगस्त ९ मा भएको निर्वाचनको परिणाममा राष्ट्रपति लुकासेन्कोले धाँधली गरेको भन्दै भइरहेको प्रदर्शनमा सोमबारदेखि सरकारी टेलिभिजनकर्मी पनि सहभागी भएका हुन् ।
टेलिभिजनकर्मी नै आन्दोलनमा सहभागी भएपछि अघिल्ला कार्यक्रमहरु दोहोर्याइरहेका छन् । राष्ट्रपतिविरुद्ध भइरहेका प्रदर्शनको प्रसारणमा रोक लगाउनका साथै केही पत्रकारलाईसमेत नियन्त्रणमा लिइएपछि आन्दोलन चर्किएको हो ।
आफ्ना प्रदर्शन पूर्ण रूपमा प्रसारण गर्न माग गर्दै शनिबार सरकारी टेलिभिजन च्यानलअगाडि हजारौं प्रदर्शनकारी जम्मा भएका थिए । सन् १९९४ देखि सत्तामा रहेका लुकासेन्कोले ८०.१ प्रतिशत मत प्राप्त गरेको निर्वाचनसम्बन्धी निकाय सेन्ट्रल इलेक्सन कमिसनले बताएको छ । प्रमुख विपक्षी स्भेट्लाना तिखानोभ्स्कायाले भने १०.१२ प्रतिशत मात्रै मत प्राप्त गरेकी छन् ।
तर उनले राम्रोसँग गणना गरे आफूले ६० देखि ७० प्रतिशत समर्थन प्राप्त गरेको दाबी गरिरहेकी छन् । निर्वाचनअघि करिब ६ हजार ७०० भन्दा बढी व्यक्तिलाई नियन्त्रणमा लिइएको थियो । उनीहरुलाई प्रहरी हिरासतमा यातना दिइएको जनाइएको छ ।
पछिल्लो समय आन्दोलन चर्किँदै जाँदा विपक्षी नेतृ तिखानोभ्स्कायालाई अन्तरिम नेतृत्वका रुपमा कार्य गर्न सुझाइएको छ । उनले एक भिडियो सन्देशमार्फत आइतबार भनेकी छन्, "म शान्ति र स्थिरताको बहाली, राजनीतिक बन्दीहरुको रिहा र नयाँ निर्वाचनको तयारीका लागि राष्ट्रिय नेता बन्न तयार छु ।"
विभिन्न ठाउँमा भइरहेको प्रदर्शनलाई प्रहरीले दबाउन खोजेपछि आन्दोलनले थप उग्ररुप लिँदै गएको छ ।
अर्कोतिर राष्ट्रपतिले पनि आफ्नो समर्थनमा प्रदर्शनहरु गर्न अनुमति दिएपछि उनको पक्षमा पनि प्रदर्शनहरु भइरहेका छन् । उनले आइतबार आफ्नो मुलुकको बचाउ र स्वतन्त्रताको रक्षा गर्न आह्वान गरेका थिए ।
आइतबार राजधानी मिन्स्कमा भएको प्रदर्शन बेलारुसको स्वतन्त्र भएदेखि यताकै 'ऐतिहासिक ठूलो प्रदर्शन' भएको स्थानीय स्वतन्त्र समाचार संस्था टट डट बाइले जनाएको छ । -बीबीसी