एजेन्सी । अस्ट्रेलियाले एकदिवसीय र टी–ट्वान्टी सिरिज खेल्न इङ्ल्यान्ड भ्रमण गर्ने भएको छ । तीन खेलको टी–ट्वान्टी सिरिज र एकदिवसीय खेल खेल्न अस्ट्रेलियाले इङ्ल्यान्ड भ्रमण गर्ने इङ्ल्यान्ड र वेल्स क्रिकेट बोर्डले जनाएको छ ।
टी–ट्वान्टी सिरिज साउथह्याम्पटनमा एकदिवसीय सिरिजभन्दा अगाडि सुरु हुने बोर्डले जनाएको छ । टि–ट्वान्टी सिरिज सेप्टेम्बर ४ बाट सुरु हुनेछ ।
त्यस्तै सेप्टेम्बर ११ देखि म्यानचेस्टरस्थित वर्ल्ड ट्राफोर्डमा एकदिवसीय सिरिज सुरु हुनेछ । तीन खेलको एकदिवसीय सिरिज आईसीसी विश्वकप सुपर लिग क्रिकेटको रुपमा हुने बोर्डले जनाएको छ । अस्ट्रेलिया २४ अगस्तमा इङ्ल्यान्ड पुग्ने छ ।
इङ्ल्यान्ड यतिबेला पाकिस्तानसँग तीन खेलको टेस्ट सिरिज खेल्दैछ । त्यसपछि तीन खेलकै टी–ट्वान्टी सिरिज खेल्नेछ । पाकिस्तानसँगको टी–ट्वान्टी सिरिज सेप्टेम्बर १ तारिखमा सकिनेछ ।
महामारी हुन पूर्व अस्ट्रेलियाले जुलाईमा इङ्ल्यान्ड भ्रमण गर्ने तय भएको थियो । तर, सम्पूर्ण खेलकुद गतिविधि स्थगित भएपछि यो सिरिज पनि स्थगित भएको थियो ।
हाल बन्द ढोकाभित्र कोरोनाविरुद्धका नियमको पालना गर्दै वेस्ट इन्डिज र आयरल्यान्डले इङ्ल्यान्ड भ्रमण गरिसकेका छन् भने पाकिस्तानले सिरिज खेलिरहेको छ ।
