काठमाडौं । नेपाल स्रष्टा समाजले अनलाइनका माध्यमबाट भिन्न प्रकृत्तिको विशेष साहित्यिक कार्यक्रम आयोजन गर्यो ।
भर्चुअल रुपमा सहभागी कविद्वारा रचना वाचन गरिएलगत्तै उपस्थित समीक्षकहरू विनोद मञ्जन तथा महेश पौडेलले समीक्षात्मक टिप्पणी गरेका थिए । कार्यक्रममा कविहरू विमर्श दाहाल, असिम सागर, सरस्वती तिमिल्सिना, ज्योति जङ्गल, डीबी टुहुरो, श्रीबाबु कार्की उदास, देवकी तिमिल्सिना समीक्षा र रीता खत्रीले कविता वाचन गरे ।
वाचित कविताहरूको धरातलका विषयमा चर्चा गर्दै विनोद मञ्जनले कवितामा कल्पनाशीलता र शिल्पपक्ष प्रचुर हुनुपर्ने र कवितामा आकर्षक विम्बको प्रयोग हुनुपर्ने विषयमा जोड दिँदै कविता आनन्द र सन्देश दिने खालका हुनुपर्ने बताए ।
कार्यक्रमका अर्का समीक्षक महेश पौडेलले कविताका अवयवहरू र रचना प्रक्रियाबारे बताउँदै अचेलका कवितामा सामयिकता बढी हावी भएको उल्लेख गरे ।
कार्यक्रमका सहजकर्ता स्रष्टा समाजका अध्यक्ष विधान आचार्यले रचना वाचनलगत्तै समीक्षात्मक टिप्पणी गरिँदा स्रष्टालाई आफ्नो कमी-कमजोरी थाहा हुने र सुधार गर्न सहज हुने ठानेरै यस किसिमको कार्यक्रम आयोजना गरिएको बताए ।
नेपाल स्रष्टा समाजले बन्दाबन्दी तथा असहज परिस्थितिबीच पनि प्रविधिमार्फत नियमित रूपमा साहित्यिक कार्यक्रमहरूको आयोजना गर्दै आएको छ ।