एक्काइसौं शताब्दीमा पनि नेपाली समाजमा बोक्सीलगायतका अन्धविश्वास कायमै छ । समाजमा व्याप्त अन्धविश्वासले बेलाबखत भयावह रूप लिने गर्छ । कञ्चनपुरको बेलौरी मारिएका दम्पतीलाई बोक्सीको शंकामा मारिएको सन्देह प्रहरीले गरेको छ । गत शुक्रवार मृतक दम्पतीमाथि सांघातिक हमला गरिएको र उपचारका क्रममा मृत्यु भएको थियो । हत्यामा संलग्न रहेको सन्देहमा मृतकका छिमेकीसहित झाँक्री काम गर्ने व्यक्तिलाई पनि प्रहरीले पक्रेको छ । यस्तै पोखराको लामाचौरमा ‘ईश्वरीय मार्ग भजन मण्डल सच्चाई केन्द्र’ सञ्चालन गरी कोरोना भगाउने दाबी गर्दैआएका एक जनाको कोभिड – १९ को संक्रमणबाट मृत्यु भएको छ । उनले धर्मका नाममा भिड जम्मा गरेर आफ्नो सम्प्रदायका अनुयायीलाई कोभिड–१९ को संक्रमण नहुने दाबी गर्दै आएका रहेछन् । 

बेलौरीको घटनामा अन्धविश्वासी छिमेकीले झाँक्रीलाई पैसा दिएर दम्पतीको हत्या गर्न लगाएको अनुमान प्रहरीको छ । लामाचौरका अन्धविश्वासी भने आफैँ अन्धविश्वासको सिकार भएको देखिन्छ । प्रार्थना गरेर कोरोना भगाउने अन्धविश्वासमा भिड बटुल्टा अन्ततः भाइरसकै संक्रमणबाट उनको ज्यान गयो । यस्तै, भ्रम फैलाउने एक जनालाई पोखराबाट प्रहरीले केही महिना पहिले पक्राउ गरेको थियो । कसैलाई बोक्सीको आरोप लगाएर हत्या, दुव्र्यवहार र हिंसा गर्ने कुचलन नेपालको लगभग सबैतिर पाइन्छ । प्रायः गरिब, बूढापाका, एकल महिला आदिमाथि बोक्सीको आरोप लगाइन्छ । सम्पन्न व्यक्तिमाथि बोक्सीको आरोप लाग्ने र त्यही निहुँमा आक्रमण गर्ने गरेको बिरलै देखिन्छ । अर्थात्, अन्धविश्वास कमजोर वर्गलाई बढी सताउने व्याधि बन्न पुगेको छ । 

बेलौरी र लामाटारका घटनाको सन्देश एउटै हो – अझै पनि नेपाली समाजमा अन्धविश्वासको जरा गहिरोसँग गाडिएको छ । जनताका यावत् कष्टहरूप्रति उदासीन रहेर अयोध्या र रामजन्मभूमि जस्ता पौराणिक कथाको ऐतिहासिकता खोज्न प्राथमिकता दिने प्रधानमन्त्री भएको देशमा समाजको तल्लो र भित्री पत्रमा रहेकाहरू अन्धविश्वासको सिकार हुनु सायद उति अनौठो पनि होइन । तर, एक्काइसौं शताब्दीमा पनि समाजमा यस्तो अन्धविश्वास रहिरहनु भने सिंगो देश नै मध्ययुगमै रहेको प्रमाण हो । यस्ता अन्धविश्वास अपेक्षाकृत पिछडिएको समुदायमा बढी व्याप्त छ । त्यसैले कोभिड–१९ कै नियन्त्रणका क्रममा जनचेतना जगाउने सामग्रीमा पनि यस्ता अन्धविश्वासविरुद्ध चेतना फैलाउने विषय समावेश गर्नुपर्ने देखिन्छ । बोक्सीको आरोपमा हत्या, हिंसा, दुव्र्यवहार हुने वा कुनै धर्मका नाममा समाजमा हानिकारक भ्रम फैलाउने प्रवृत्ति रोक्न तीनै तहका सरकार सजग र क्रियाशील होऊन् ।