काठमाडौं । अखिल नेपाल फुटबल संघ (एन्फा) ले नेपाली राष्ट्रिय पुरुष फुटबल टोलीका खेलाडी ११ खेलाडीको पीसीआर परीक्षण गरेको छ ।
एन्फाले सोमबार पाटन अस्पतालमा ११ खेलाडीसहित २५ जनाको पीसीआर परीक्षण गरेको एन्फा प्रवक्त किरण राईले जानकारी दिए ।
बन्द प्रशिक्षण सुरु गर्न क्वारेन्टिनमा बसेका खेलाडीहरु मध्येबाट ११ खेलाडी, दुई अफिसियल र १२ पदाधिकारी गरी २५ जनाको पीसीआर परीक्षण गरिएको प्रवक्ता राईले जानकारी दिए । आज परीक्षण गरिएका खेलाडी र पदाधिकारीको रिपोर्ट भने दुई-तीन दिनमा आउनेसमेत उनले बताए ।
खेलाडी र पदाधिकारी गरी ७० जनाको पीसीआर परीक्षण गर्ने योजना बनाएको एन्फाले बाँकी व्यक्तिहरुको परीक्षण मंगलबार गर्ने जनाएको छ । यसअघि ललितपुर महानगरपालिकाले क्वारेन्टिनका रुपमा प्रयोग गर्दै आएको एन्फा होस्टेल समयमै खाली गर्न नसकेपछि खेलाडीको पीसीआर परीक्षणमा ढिलाइ भएको थियो ।
फिफा विश्वकप २०२२ एएफसी एसियन कप २०२३ को संयुक्त छनोटको तयारीमा रहेको एन्फाले भदौ १ बाट प्रशिक्षण थाल्ने तयारी गरेको छ । एन्फाले बन्द प्रशिक्षणमा रहेका खेलाडीलाई तीन समूहमा राखी प्रशिक्षण गर्ने जनाएको छ । नेपालले विश्वकप छनोटअन्तर्गतका बाँकी तीन खेल घरेलु मैदान दशरथ रंगशालामा खेल्नेछ ।
आज पीसीआर परीक्षण भएका खेलाडी र पदाधिकारी
किरण श्रेष्ठ (प्रशिक्षक), आविष्कार पुडासैनी (फिजियो), रञ्जित धिमाल, मिक्छेन तामाङ, विशाल राई ‘बी’, रवि पासवान, विमल राना, दर्शन गुरुङ, दीप कार्की, दिलेन लोक्तान, छिरिङ गुरुङ, पुजन उपरकोटी र देवेन्द्र तामाङ ।
होस्टेल स्टाफ
भान्सा स्टाफ : ६ जना
क्लिनर : २ जना
केयर टेकर : ४ जना
